വെള്ളിയിൽ വൻ തകർച്ച വരുന്നു! 75% ഇടിവിന് സാധ്യതയെന്ന് വിദഗ്ധർ; കാരണമറിയാം

വെള്ളി നിക്ഷേപകര്‍ അറിഞ്ഞിരിക്കേണ്ട ഞെട്ടിക്കുന്ന വിവരങ്ങളാണ് ഇപ്പോള്‍ പുറത്തുവരുന്നത്. വരും വര്‍ഷങ്ങളില്‍ വെള്ളി വിലയില്‍ 75% മുതല്‍ 80% വരെ ഇടിവുണ്ടാകുമെന്ന് സാമ്പത്തിക വിദഗ്ധര്‍ മുന്നറിയിപ്പ് നല്‍കുന്നു.

എന്താണ് വെള്ളി വിപണിയില്‍ സംഭവിക്കുന്നത്?

അന്താരാഷ്ട്ര വിപണിയായ കോമെക്‌സിലും, ഇന്ത്യന്‍ വിപണിയായ എംസിഎക്‌സിലും വെള്ളിയുടെ വില കുത്തനെ ഇടിയുകയാണ്. കഴിഞ്ഞ വര്‍ഷം കണ്ട വന്‍ കുതിപ്പിന് ശേഷം, വെള്ളി ഇപ്പോള്‍ അതിന്റെ റെക്കോര്‍ഡ് വിലയില്‍ നിന്നും ഏകദേശം 40% താഴെയാണ് വ്യാപാരം നടത്തുന്നത്. ഇടയ്ക്കിടെ വില കൂടുന്നത് വെറുമൊരു ഡെഡ് ക്യാറ്റ് ബൗണ്‍സ് മാത്രമാണെന്നും വില ഇനിയും താഴേക്ക് പോകുമെന്നുമാണ് വിദഗ്ധരുടെ പക്ഷം.

വില കുറയാനുള്ള പ്രധാന കാരണങ്ങള്‍:

വിപണി നിരീക്ഷകനായ അനുജ് ഗുപ്തയുടെ അഭിപ്രായത്തില്‍ പ്രധാനമായും രണ്ട് കാര്യങ്ങളാണ് വിലയെ സ്വാധീനിക്കുന്നത്

ആഗോള സംഘര്‍ഷങ്ങളിലെ അയവ്: യുഎസ്-ഇറാന്‍ ആണവ ചര്‍ച്ചകള്‍ പുനരാരംഭിച്ചത് വിപണിയിലെ ആശങ്കകള്‍ കുറച്ചു. സുരക്ഷിത നിക്ഷേപം എന്ന നിലയില്‍ വെള്ളിയോടുള്ള താല്പര്യം കുറയാന്‍ ഇത് കാരണമായി.

ശക്തമാകുന്ന യുഎസ് ഡോളര്‍: ആഗോള കറന്‍സികള്‍ക്കെതിരെ യുഎസ് ഡോളര്‍ കരുത്താര്‍ജ്ജിക്കുന്നത് വെള്ളി വിലയെ പ്രതികൂലമായി ബാധിക്കുന്നു.

പേസ് 360-ലെ ചീഫ് ഗ്ലോബല്‍ സ്ട്രാറ്റജിസ്റ്റ് അമിത് ഗോയല്‍ ചൂണ്ടിക്കാട്ടുന്ന മറ്റൊരു പ്രധാന സംഗതി വെള്ളിയുടെ വ്യവസായ ഡിമാന്‍ഡില്‍ വരുന്ന ഇടിവാണ്:

സോളാര്‍ പാനലുകള്‍: സോളാര്‍ സെല്ലുകളുടെ നിര്‍മ്മാണത്തില്‍ വെള്ളിയ്ക്ക് പകരം ചെമ്പ് ഉപയോഗിച്ച് തുടങ്ങിക്കഴിഞ്ഞു.

ബാറ്ററി സാങ്കേതികവിദ്യ: സോളിഡ്-സ്റ്റേറ്റ് ബാറ്ററികളിലും വെള്ളിക്ക് പകരക്കാരെ കണ്ടെത്താനുള്ള ശ്രമങ്ങള്‍ ഇസ്രായേല്‍, തായ്വാന്‍ തുടങ്ങിയ രാജ്യങ്ങളില്‍ സജീവമാണ്.

ചരിത്രം ആവര്‍ത്തിക്കുമോ?

1980-ലും 2011-ലും വെള്ളി വില റെക്കോര്‍ഡ് ഉയരത്തില്‍ എത്തിയ ശേഷം ഏകദേശം 75% വരെ ഇടിഞ്ഞ ചരിത്രമുണ്ട്. സമാനമായ ഒരു സാഹചര്യമാണ് ഇപ്പോഴും നിലനില്‍ക്കുന്നത്.വിദഗ്ധ പ്രവചനം: അടുത്ത രണ്ട് വര്‍ഷത്തിനുള്ളില്‍ അന്താരാഷ്ട്ര വിപണിയില്‍ വെള്ളി വില ഔണ്‍സിന് 25 മുതല്‍ 30 ഡോളര്‍ വരെയാകാന്‍ സാധ്യതയുണ്ട്. നിലവില്‍ ഇത് 121 ഡോളര്‍ എന്ന റെക്കോര്‍ഡ് നിലവാരത്തില്‍ നിന്നുള്ള വന്‍ വീഴ്ചയായിരിക്കും.