Nifty Technical Analysis: 22,550 കടന്നില്ലെങ്കില്‍ വന്‍ തകര്‍ച്ചയോ?

കഴിഞ്ഞ ആഴ്ചകളിലെ കനത്ത തിരുത്തലുകള്‍ക്ക് ശേഷം വിപണിയില്‍ ചെറിയൊരു ആശ്വാസ റാലി പ്രകടമായെങ്കിലും, നിഫ്റ്റിയെ സംബന്ധിച്ചിടത്തോളം വരും ദിവസങ്ങള്‍ അതിനിര്‍ണായകമാണ്. സൂചിക ഇപ്പോള്‍ ആഴത്തിലുള്ള ഓവര്‍സോള്‍ഡ് മേഖലയിലാണെന്നും, നിലവിലെ നെഗറ്റീവ് ഘടനയെ മാറ്റിമറിക്കാന്‍ ചില നിര്‍ണായക ലെവലുകള്‍ ഭേദിക്കേണ്ടതുണ്ടെന്നുമാണ് പ്രമുഖ ബ്രോക്കറേജ് സ്ഥാപനങ്ങളിലെ സാങ്കേതിക വിശകലന വിദഗ്ധര്‍ ചൂണ്ടിക്കാണിക്കുന്നത്. വിപണിയുടെ ഗതി നിശ്ചയിക്കുന്ന പ്രധാനപ്പെട്ട മാര്‍ക്കര്‍ 22,550 ലെവലാണെന്ന് വിദഗ്ധര്‍ വ്യക്തമാക്കുന്നു.

മോത്തിലാല്‍ ഓസ്വാളിലെ ഡെറിവേറ്റീവ്‌സ് ആന്‍ഡ് ടെക്‌നിക്കല്‍ റിസര്‍ച്ച് ഹെഡ് ചന്ദന്‍ തപാരിയയുടെ വിലയിരുത്തല്‍ പ്രകാരം, സൂചിക 22,550-ന് മുകളില്‍ പിടിച്ചുനില്‍ക്കാന്‍ കഴിഞ്ഞാല്‍ അത് വിപണിക്ക് വലിയ സ്ഥിരത നല്‍കും. ഇത് തുടര്‍ന്ന് 22,786 മുതല്‍ 23,000 വരെയുള്ള ഉയര്‍ന്ന ലെവലുകളിലേക്ക് ശക്തമായ തിരിച്ചുവരവ് ഉണ്ടാക്കാന്‍ സഹായിക്കുമെന്നും അദ്ദേഹം കണക്കാക്കുന്നു. എന്നാല്‍, സൂചികയ്ക്ക് ഈ നിര്‍ണായക കടമ്പ ഭേദിക്കാന്‍ സാധിച്ചില്ലെങ്കില്‍ ഈ മുന്നേറ്റം പാഴായിപ്പോകുമെന്നും, അത് വീണ്ടും 22,222 എന്ന താഴ്ന്ന നിലവാരം പരീക്ഷിക്കുന്നതിലേക്ക് വിപണിയെ നയിക്കുമെന്നും തപാരിയ മുന്നറിയിപ്പ് നല്‍കുന്നു. അതിനാല്‍ വിപണിയില്‍ അര്‍ത്ഥവത്തായ ഒരു തിരിച്ചുവരവ് കാണണമെങ്കില്‍ നിഫ്റ്റി 22,550-ന് മുകളില്‍ സസ്റ്റിന്‍ ചെയ്യേണ്ടത് അത്യാവശ്യമാണ്. Nifty Technical Analysis Malayalam

കൊട്ടക് നിയോയുടെ വിദഗ്ധനായ അമോല്‍ അത്താവറെയുടെ അഭിപ്രായത്തില്‍, വിപണി നിലവില്‍ താഴ്ന്ന നിലവാരങ്ങളുടെ നെഗറ്റീവ് ഘടനയിലാണെങ്കിലും ഓവര്‍സോള്‍ഡ് അവസ്ഥയിലായതിനാല്‍ പെട്ടെന്നുള്ള ഒരു തിരിച്ചുവരവ് പൂര്‍ണ്ണമായി തള്ളിക്കളയാനാവില്ല. അദ്ദേഹത്തിന്റെ കണക്കുകൂട്ടല്‍ പ്രകാരം 22,400 ആണ് വിപണിയുടെ പ്രധാന പിന്തുണ. ഈ ലെവല്‍ മറി കടന്നാല്‍ നിഫ്റ്റിക്ക് 22,800-ഉം അതിനുമുകളില്‍ 23,000-ഉം ലക്ഷ്യമാക്കാന്‍ സാധിക്കും. എങ്കിലും, എല്‍.കെ.പി സെക്യൂരിറ്റീസിന്റെ രൂപക് ദേ ഓര്‍മ്മിപ്പിക്കുന്നത്, വെള്ളിയാഴ്ചത്തെ മുന്നേറ്റം സുസ്ഥിരമായി തുടരണമെങ്കില്‍ നിഫ്റ്റി 22,600 - 22,650 എന്ന 50-ഇ.എം.എ (50-EMA) നിലവാരം ഭേദിച്ച് അതിനുമുകളില്‍ നിലനില്‍ക്കേണ്ടതുണ്ട് എന്നാണ്. ഈ പ്രദേശം സംരക്ഷിക്കുന്നതില്‍ പരാജയപ്പെട്ടാല്‍ സൂചിക വീണ്ടും കടുത്ത വില്‍പ്പന സമ്മര്‍ദ്ദത്തിലേക്കും ദൗര്‍ബല്യത്തിലേക്കും വഴിമാറാന്‍ സാധ്യതയുണ്ട്. അതിനാല്‍ നിക്ഷേപകര്‍ അതീവ ജാഗ്രതയോടെ വിപണി നീക്കങ്ങളെ വീക്ഷിക്കേണ്ടതുണ്ട്.