കേരള ക്രിക്കറ്റ് അസോസിയേഷന്റെ കീഴില് കൊല്ലം എഴുകോണില് അന്തരാഷ്ട്ര നിലവാരത്തിലുള്ള അത്യാധുനിക ക്രിക്കറ്റ് സ്റ്റേഡിയം വരുന്നു. പത്ത് ഏക്കര് വിസ്തൃതിയില് കെസിഎയുടെ ഉടമസ്ഥതയിലുള്ള ഭൂമിയിലാണ് സ്റ്റേഡിയം ഒരുങ്ങുന്നത്. 56 കോടി രൂപ ആകെ ചെലവ് പ്രതീക്ഷിക്കുന്ന പദ്ധതിയുടെ നിര്മാണോദ്ഘാടനം ഈ മാസം 25 ന് രാവിലെ 11ന് ധനമന്ത്രി കെ.എന് ബാലഗോപാല് നിര്വ്വഹിക്കും.
ആദ്യഘട്ടത്തില് 21 കോടിയുടെ നിര്മ്മാണ പ്രവര്ത്തനങ്ങളാണ് നടത്തുക. 2026 അവസാനത്തോടെ പദ്ധതിയുടെ ആദ്യഘട്ടം പൂർത്തീകരിക്കും. അഭ്യന്തര മത്സരങ്ങള് നടത്താനുള്ള 150 മീറ്റര് വ്യാസമുള്ള ക്രിക്കറ്റ് ഗ്രൗണ്ട്, കളിക്കാരുടെ ഡ്രസ്സിംഗ് റൂം ഉള്പ്പെടുന്ന ആധുനിക പവലിയന്, ഓപ്പണ് എയര് ആംഫി തീയേറ്റര് മാതൃകയില് രൂപകല്പ്പന ചെയ്തിട്ടുള്ള ഗാലറി, മികച്ച സൗകര്യങ്ങളുള്ള ഓഫീസ് ബ്ലോക്ക്, ഔട്ട് ഡോര് നെറ്റ് പ്രാക്ടീസ് സൗകര്യം, ഏത് കാലാവസ്ഥയിലും പരിശീലനം നടത്താവുന്ന ഇന്ഡോര് പ്രാക്ടീസ് സംവിധാനം, മറ്റ് കായികയിനങ്ങൾക്കുള്ള സൗകര്യങ്ങൾ, അത്യാധുനിക ജിംനേഷ്യം, വിശാലമായ കാര് പാര്ക്കിംഗ് എന്നീ സൗകര്യങ്ങള് ഉണ്ടായിരിക്കും.