മസ്ദ മോട്ടോര്‍ കോര്‍പറേഷന്‍ ലിമിറ്റഡ്

ഹിരോഷിമ, രണ്ടാം ലോകമഹായുദ്ധത്തിന്റെ ഏറ്റവും വലിയ ദുരന്തഭൂമിക. ഫാക്ടറികളും വാണിജ്യസ്ഥാപനങ്ങളും നിരവധിയുള്ള ഇവിടെയാണ് രണ്ടാം ലോകമഹായുദ്ധത്തിന് അന്ത്യം കുറിച്ചുകൊണ്ട് അമേരിക്കയുടെ ഫാറ്റ്മാന്‍ എന്ന അണുബോംബ് പതിച്ച സ്ഥലം. അവിടെയാണ്, 1920 ല്‍ ജപ്പാനിലെ ഏറ്റവും വലിയ വാഹന നിര്‍മാതാക്കളായ മസ്ദയും പിറവികൊണ്ടത്.

ഒരു കോര്‍ക്ക് നിര്‍മ്മാണ ഫാക്ടറിയായാണ് 'മസ്ദ ടോയോ കോര്‍ക്ക് കോഗ്യോ കമ്പനി ലിമിറ്റഡ്' പ്രവര്‍ത്തനമാരംഭിച്ചത്. സ്ഥാപകനായ ടോയോ കോര്‍ക്ക് കോഗ്യോ 1927 ലാണ് 'ടോയോ കോഗ്യോ കമ്പനി ലിമിറ്റഡ്' എന്ന പേര് സ്വീകരിക്കുന്നത്. മസ്ദ-ഗോ എന്ന ഓട്ടോറിക്ഷ നിര്‍മ്മിച്ചുകൊണ്ട് 1931 ലാണ് യന്ത്രോപകരണങ്ങളുടെ നിര്‍മ്മാണത്തില്‍ നിന്ന് പിന്‍വാങ്ങി കമ്പനി വാഹന നിര്‍മ്മാണത്തിലേക്ക് കടക്കുന്നത്. രണ്ടാം ലോക മഹായുദ്ധത്തിലുടനീളം ടോയോ കോഗ്യോ ജാപ്പനീസ് സൈന്യത്തിന് ആയുധങ്ങള്‍ നിര്‍മ്മിച്ച് നല്‍കിയിരുന്നു. പ്രത്യേകിച്ച് സീരീസ് 30 മുതല്‍ 35 വരെയുള്ള ടൈപ്പ് 99 റൈഫിളുകള്‍.

1984 ലാണ് കമ്പനി ഔപചാരികമായി മസ്ദ എന്ന പേര് സ്വീകരിക്കുന്നത്. എന്നാല്‍ ആദ്യം മുതല്‍ വിറ്റഴിച്ച എല്ലാ വാഹനങ്ങള്‍ക്കും ആ പേര് കമ്പനി നിലനിര്‍ത്തിയിരുന്നു. 1960 ല്‍ അവതരിപ്പിച്ച മസ്ദ R360യും 1962 ല്‍ ഇറക്കിയ മസ്ദ കരോളും 'മസ്ദ ഓട്ടോ സ്റ്റോര്‍' എന്നറിയപ്പെട്ട പാസഞ്ചര്‍ കാറുകള്‍ വില്‍ക്കുന്ന പ്രത്യേക റീട്ടെയില്‍ ഡീലര്‍ഷിപ്പില്‍ ആണ് വിറ്റിരുന്നത്. അതേസമയം വാണിജ്യ ഉല്‍പ്പന്നങ്ങള്‍ 'മസ്ദ സ്റ്റോറില്‍'ലും വിറ്റു. സവന്ന, ഫാമിലിയ, ലൂസ്, കോസ്‌മോ, കാപെല്ല തുടങ്ങിയ പാസഞ്ചര്‍ കാറുകള്‍ മസ്ദ തുടര്‍ന്നും വിപണിയിലെത്തിച്ചപ്പോള്‍ ഇവയൊക്കെ 'മസ്ദ ഓട്ടോ സ്റ്റോര്‍' നെറ്റ്വര്‍ക്കിലേക്ക് മാത്രം ചേര്‍ത്തു.

1960 കളില്‍ തുടങ്ങി, NSU Ro 80 ല്‍ നിന്ന് പ്രചോദനം ഉള്‍ക്കൊണ്ട്, മറ്റ് ജാപ്പനീസ് ഓട്ടോ കമ്പനികളില്‍ നിന്ന് വ്യത്യസ്തമാക്കുന്നതിനുള്ള ഒരു മാര്‍ഗമായി വാങ്കല്‍ റോട്ടറി എഞ്ചിന്‍ വികസിപ്പിക്കുന്നതിന് ഒരു വലിയ ശ്രമം നടത്താന്‍ മസ്ദ തീരുമാനിച്ചു. ജര്‍മ്മന്‍ കമ്പനിയായ NSU-മായി കമ്പനി ഒരു ബിസിനസ്സ് ബന്ധം ഉണ്ടാക്കുകയും 1967 ലെ പരിമിതമായ ഉല്‍പ്പാദനം കോസ്‌മോ സ്‌പോര്‍ട്‌സുമായി ചേര്‍ന്നാരംഭിക്കുകയും ചെയ്തു. വാഹന വിപണിയിലെ വാങ്കല്‍-ടൈപ്പ് എഞ്ചിനുകളുടെ ഏക നിര്‍മ്മാതാവായി ഇതോടെ മസ്ദ മാറി.

1974 മുതല്‍ 2015 വരെ, മസ്ദയ്ക്ക് ഫോര്‍ഡ് മോട്ടോര്‍ കമ്പനിയുമായി പങ്കാളിത്തമുണ്ടായിരുന്നു. 1979 ല്‍ 24.5% ഓഹരികള്‍ സ്വന്തമാക്കി കമ്പനി ഏറ്റെടുത്തു. 2008 മുതല്‍ 2015 വരെ മസ്ദയിലെ ഓഹരികള്‍ ഫോര്‍ഡ് ക്രമേണ വിറ്റഴിച്ചു. 2014 ലെ കണക്കനുസരിച്ച് മസ്ദയുടെ 2.1% മാത്രമായിരുന്നു ഫോര്‍ഡ് കൈവശം വച്ചിരുന്നത്.

പതിറ്റാണ്ടുകളായി ഹൈഡ്രജന്‍ വാഹനങ്ങളില്‍ ഗവേഷണം നടത്തിയതിന്റെ ഭാഗമായി ഹൈഡ്രജനിലോ ഗ്യാസോലിനിലോ പ്രവര്‍ത്തിക്കാന്‍ കഴിയുന്ന കോംപാക്റ്റ് മിനിവാനിന്റെ ഒരു ഹൈബ്രിഡ് പതിപ്പ് വികസിപ്പിച്ചെടുത്തിട്ടുണ്ട്. എന്നാല്‍ ഇന്നും കാര്യമായ മുന്നേറ്റം ഇതിലുണ്ടാക്കാന്‍ കഴിഞ്ഞിട്ടില്ല. 2010-ല്‍ ടൊയോട്ടയും മസ്ദയും ടൊയോട്ടയുടെ പ്രിയസ് മോഡലില്‍ ഉപയോഗിക്കുന്ന ഹൈബ്രിഡ് സാങ്കേതികവിദ്യയില്‍ ഒരു വിതരണ കരാര്‍ പ്രഖ്യാപിച്ചു.

സ്‌കൈആക്ടീവ് ടെക്‌നോളജി എന്നത് ചില പുതിയ മസ്ദ വാഹനങ്ങളില്‍ ഉപയോഗിക്കുന്ന ഒരു സാങ്കേതികവിദ്യയാണ്. ഈ സാങ്കേതികവിദ്യയില്‍ ഉയര്‍ന്ന കംപ്രഷന്‍ അനുപാതമുള്ള ഗ്യാസോലിന്‍ എഞ്ചിനുകള്‍ (13.0 മുതല്‍ 1 വരെ), പുതിയ 2 ഘട്ട ടര്‍ബോചാര്‍ജര്‍ ഡിസൈന്‍ ഉള്ള ഡീസല്‍ എഞ്ചിനുകള്‍ (14.0 മുതല്‍ 1 വരെ), ഉയര്‍ന്ന കാര്യക്ഷമമായ ഓട്ടോമാറ്റിക് ട്രാന്‍സ്മിഷനുകള്‍, ഭാരം കുറഞ്ഞ മാനുവല്‍ ട്രാന്‍സ്മിഷനുകള്‍, ലൈറ്റ് വെയ്റ്റ് ബോഡി ഡിസൈനുകള്‍, ഇലക്ട്രിക് പവര്‍ സ്റ്റിയറിംഗ് എന്നിവയൊക്കെ ഉള്‍പ്പെടുന്നു. ഇതിലും മികച്ച ഇന്ധനക്ഷമത കൈവരിക്കാന്‍ ഈ സാങ്കേതികവിദ്യയെ ഒരു ഹൈബ്രിഡ് ഡ്രൈവ് ട്രെയിനുമായി സംയോജിപ്പിക്കാനും സാധിക്കും.

2015 ല്‍, പുനര്‍രൂപകല്‍പ്പന ചെയ്ത MX-5 പുറത്തിറക്കിയതിനടനുബന്ധിച്ച്, 'ഡ്രൈവിംഗ് മാറ്റേഴ്സ്' എന്ന ടാഗ്ലൈനില്‍ മസ്ദ ആരംഭിച്ച കാമ്പെയ്ന്‍ ഏറെ ജനശ്രദ്ധ നേടിയിരുന്നു. നോര്‍ത്ത് അമേരിക്കയാണ് മസ്ദ മോട്ടോര്‍സിന്റെ നിലവിലെ ഏറ്റവും വലിയ വിപണി. ഇന്ത്യന്‍ നിരത്തുകള്‍ക്കും മസ്ദയുടെ വാഹനങ്ങള്‍ സുപരിചിതമാണ്. മിനിബസ്, മിനി ലോറി വിഭാഗങ്ങളില്‍ മസ്ദ ഇന്ത്യന്‍ വിപണിയില്‍ സജീവ സാന്നിധ്യമാണ്. സ്വരാജ് കമ്പനിയുമായി ചേര്‍ന്ന് സ്വരാജ് മസ്ദ എന്ന പേരിലാണ് ഇന്ത്യയില്‍ മസ്ദയുടെ ഹെവി വെഹിക്കുകള്‍ ഇറങ്ങുന്നത്.