പഴയ വാഹനമുണ്ടോ? ഫിറ്റ്നസ് ടെസ്റ്റ് ഫീസ് ഇനി പൊള്ളും
ടെസ്റ്റ് ഫീസ് വര്ധിപ്പിച്ചത് പത്തിരട്ടിയായി
രാജ്യത്തെ പഴയ വാഹനങ്ങളുടെ ഫിറ്റ്നസ് പരിശോധനാ ഫീസ് പത്ത് മടങ്ങ് വര്ധിപ്പിച്ച് റോഡ് ഗതാഗത, ഹൈവേ മന്ത്രാലയം. കേന്ദ്ര മോട്ടോര് വാഹന നിയമങ്ങള് (അഞ്ചാം ഭേദഗതി) പ്രകാരമുള്ള ഭേദഗതികള് ഉടനടി പ്രാബല്യത്തില് വരും. വാഹനത്തിന്റെ പഴക്കവും വിഭാഗവും അനുസരിച്ച് ഫീസ് ഘടനയില് കാര്യമായ മാറ്റങ്ങളുണ്ടാകും.
15 വര്ഷത്തില് കൂടുതലുള്ള വാഹനങ്ങള്ക്കാണ് ഉയര്ന്ന ഫീസ് ഈടാക്കിയിരുന്നത്. ഇപ്പോള് അത് അത് 10 വര്ഷമായി പരിഷ്ക്കരിച്ചു.
വാഹനങ്ങളുടെ പഴക്കം അനുസരിച്ച് മുന്നു വിഭാഗങ്ങളായാണ് ഫിറ്റ്നസ് ഫീസ് ഉയര്ത്തിയത്. ആദ്യത്തേത് 10-15വര്ഷം പഴക്കമുള്ള പട്ടികയില് പെടുന്നു. രണ്ടാമത്തേത് 15-20 വര്ഷവും മൂന്നാമത്തേത് 20 വര്ഷത്തില് കൂടുതല് പഴക്കമുള്ള വാഹനങ്ങളും ഉള്ക്കൊള്ളുന്നു. പഴക്കം വര്ധിക്കുന്നതിന് അനുസരിച്ച് ഫീസും ഉയരുന്നു.ഇത് 15 വര്ഷത്തില് കൂടുതലുള്ള വാഹനങ്ങള്ക്ക് ബാധകമായ മുന് ഫ്ലാറ്റ് നിരക്കില് നിന്ന് വ്യത്യസ്തമാണ്.
ഏറ്റവും പ്രധാനപ്പെട്ട വര്ദ്ധനവ് ഹെവി കൊമേഴ്സ്യല് വാഹനങ്ങളെ ബാധിക്കുന്നു. 20 വര്ഷത്തില് കൂടുതലുള്ള ട്രക്കുകള്ക്കോ ബസുകള്ക്കോ ഇപ്പോള് ഫിറ്റ്നസ് പരിശോധനയ്ക്ക് 25,000 രൂപ ഫീസ് ഈടാക്കും. മുമ്പ് ഇത് 2500 രൂപയായിരുന്നു. അതേ കാലപ്പഴക്കമുള്ള ഇടത്തരം വാണിജ്യ വാഹനങ്ങള്ക്ക് 20,000 രൂപ ഈടാക്കും. മുന്പ് ഇത് 1800 രൂപയായിരുന്നു.
20 വര്ഷത്തില് കൂടുതല് പഴക്കമുള്ള ലൈറ്റ് മോട്ടോര് വാഹനങ്ങള്ക്ക് ഫീസ് 15,000 രൂപയായി ഉയര്ത്തി. 20 വര്ഷത്തില് കൂടുതല് പഴക്കമുള്ള മുച്ചക്ര വാഹനങ്ങള്ക്ക് ഇപ്പോള് 7,000 രൂപ നല്കണം. 20 വര്ഷത്തില് കൂടുതല് പഴക്കമുള്ള ഇരുചക്ര വാഹനങ്ങളുടെ ഫീസ് മൂന്നിരട്ടിയിലധികം വര്ദ്ധിച്ചു, 600 രൂപയില് നിന്ന് 2,000 രൂപയുമായി.