താരിഫ്; ഐഫോണ്‍, ഇലക്ട്രോണിക്‌സ് മേഖലക്ക് വന്‍ തിരിച്ചടിയെന്ന് റിപ്പോര്‍ട്ട്

യുഎസ് താരിഫ് പ്രഖ്യാപനം ഇന്ത്യയിലെ ഐഫോണ്‍ നിര്‍മാണത്തിനും ഇലക്ട്രോണിക്‌സ് കയറ്റുമതിക്കും തിരിച്ചടിയെന്ന് റിപ്പോര്‍ട്ട്. ഇന്ത്യയില്‍ ഐഫോണ്‍ നിര്‍മാണം വിപുലീകരിക്കുന്നതിന്റെ പാതയിലാണ് ആപ്പിള്‍. താരിഫ് നടപ്പായാല്‍ കമ്പനിക്ക് അത് വലിയ തിരിച്ചടിയാകും. ഓഗസ്റ്റ് ഒന്നുമുതലാണ് താരിഫ് നിലവില്‍ വരിക.

നിര്‍ണായക ഘടകങ്ങള്‍, വൈദഗ്ധ്യമുള്ള സാങ്കേതിക വിദഗ്ദ്ധര്‍ എന്നിവയുടെ വിതരണത്തില്‍ ചൈന ഏര്‍പ്പെടുത്തിയ നിയന്ത്രണങ്ങള്‍ കാരണം ഇന്ത്യന്‍ ഇലക്ട്രോണിക്‌സ് ഉല്‍പ്പാദനം സമ്മര്‍ദ്ദത്തിലായിരിക്കുന്ന സമയത്താണ് യുഎസിന്റെ ഈ നീക്കം.

ചൈനീസ് നിയന്ത്രണങ്ങള്‍ ഉല്‍പ്പാദനത്തെ മന്ദഗതിയിലാക്കിയേക്കാം. എന്നാല്‍ യുഎസ് താരിഫ് ഇന്ത്യയില്‍ നിന്നുള്ള ഇലക്ട്രോണിക്‌സ് കയറ്റുമതിയെ ബാധിക്കുമെന്ന് വ്യവസായ വിദഗ്ധര്‍ പറയുന്നു.

ഇന്ത്യയില്‍ നിന്ന് യുഎസിലേക്കുള്ള കയറ്റുമതിക്ക് 25 ശതമാനം തീരുവ ചുമത്തുമെന്ന ഇന്നത്തെ പെട്ടെന്നുള്ള പ്രഖ്യാപനം ഇന്ത്യയെ യുഎസിലേക്കുള്ള ഐഫോണ്‍ കയറ്റുമതിയുടെ ഒരു വലിയ കയറ്റുമതി കേന്ദ്രമാക്കാനുള്ള ആപ്പിളിന്റെ പദ്ധതിയെ തീര്‍ച്ചയായും ബാധിക്കും, ''ഐഡിസി ഇന്ത്യ, സൗത്ത് ഏഷ്യ & എഎന്‍സെഡ്, ഉപകരണ ഗവേഷണ അസോസിയേറ്റ് വൈസ് പ്രസിഡന്റ് നവ്കേന്ദര്‍ സിംഗ് പറഞ്ഞു.

'ഇന്ത്യയില്‍ അസംബിള്‍ ചെയ്ത ഐഫോണുകളില്‍ നിന്നുള്ള യുഎസിലെ ഐഫോണ്‍ ആവശ്യകത നിറവേറ്റുന്നതിന് ഇന്ത്യയില്‍ ഗണ്യമായ ഉല്‍പ്പാദന വികസനം ആവശ്യമാണ്, ഇത് ഈ പുതിയ താരിഫുകള്‍ നേരിട്ട് ബാധിക്കും,' സിംഗ് പറഞ്ഞു.

2024-25 ല്‍ നിര്‍മ്മിച്ച ഏകദേശം 35-40 ദശലക്ഷം യൂണിറ്റുകളില്‍ നിന്ന് ഈ വര്‍ഷം ഐഫോണ്‍ ഉത്പാദനം 60 ദശലക്ഷം യൂണിറ്റായി ഉയര്‍ത്താന്‍ ആപ്പിള്‍ പദ്ധതിയിടുന്നുണ്ടെന്ന് ഒന്നിലധികം സ്രോതസ്സുകള്‍ പറയുന്നു.

മാര്‍ച്ച് 29 ന് അവസാനിച്ച രണ്ടാം പാദത്തിലെ വരുമാന അവലോകന യോഗത്തില്‍, ഏപ്രില്‍-ജൂണ്‍ കാലയളവില്‍ യുഎസില്‍ വില്‍ക്കുന്ന എല്ലാ ഐഫോണുകളും ഇന്ത്യയില്‍ നിന്ന് കയറ്റുമതി ചെയ്യുമെന്ന് ആപ്പിള്‍ സിഇഒ ടിം കുക്ക് പ്രഖ്യാപിച്ചിരുന്നു.

തായ്വാനീസ് കരാര്‍ നിര്‍മ്മാതാക്കളായ ഫോക്സ്‌കോണിന്റെ തമിഴ്നാട്ടിലെ ഫാക്ടറിയിലാണ് ഇന്ത്യയില്‍ നിര്‍മ്മിച്ച ഐഫോണുകള്‍ കൂട്ടിച്ചേര്‍ക്കുന്നത്.

ട്രംപ് പ്രഖ്യാപിച്ച 25 ശതമാനം തീരുവ നിലവിലുള്ള 10 ശതമാനം അടിസ്ഥാന താരിഫിന് പുറമേ ചുമത്തുമോ എന്ന കാര്യത്തില്‍ വ്യവസായ മേഖലയിലുള്ളവര്‍ ആശയക്കുഴപ്പത്തിലാണ്.