ഇന്ത്യയിലെ ഇവി നിര്മാണം: ടെസ്ലക്ക് താല്പര്യമില്ലെന്ന് കേന്ദ്രമന്ത്രി
- ഇന്ത്യ ഇവി നയം അവതരിപ്പിച്ചത് വാഹന നിര്മ്മാതാക്കളെ ആകര്ഷിക്കുന്നതിനായി
- നിര്മാണ പ്രതിബദ്ധതകള്ക്ക് പകരമായി ഇറക്കുമതി തീരുവ സര്ക്കാര് കുറയ്ക്കും
ടെസ്ല അടുത്തൊന്നും ഇന്ത്യയില് ഇലക്ട്രിക് വാഹനങ്ങള് നിര്മ്മിക്കുമെന്ന് പ്രതീക്ഷിക്കുന്നില്ലെന്ന് കേന്ദ്രമന്ത്രി എച്ച്ഡി കുമാരസ്വാമി. ടെസ്ല വിപണിയിലെത്താന് തയ്യാറെടുക്കുന്നുണ്ടെങ്കിലും, പ്രാദേശിക ഉല്പ്പാദനം അതിന്റെ ഉടനടിയുള്ള പദ്ധതികളുടെ ഭാഗമല്ല.
മുംബൈയിലെ ബാന്ദ്ര കുര്ള കോംപ്ലക്സില് ഒരു ഷോറൂം സ്ഥലം അന്തിമമാക്കുകയും സ്റ്റോര് മാനേജര്മാരുള്പ്പെടെ ഇന്ത്യയില് രണ്ട് ഡസനിലധികം ജീവനക്കാരെ നിയമിക്കുകയും ചെയ്തിട്ടും, ടെസ്ല ഈ ഘട്ടത്തില് പ്രാദേശിക ഉല്പ്പാദനം പരിഗണിക്കുന്നില്ലെന്നാണ് റിപ്പോര്ട്ട്.
ഇന്ത്യയില് തങ്ങളുടെ ഇലക്ട്രിക് വാഹനങ്ങള് വില്ക്കുന്നതിനുള്ള പ്രക്രിയ കമ്പനി ആരംഭിച്ചു കഴിഞ്ഞു. അടുത്ത രണ്ടോ മൂന്നോ മാസത്തിനുള്ളില് വിപണിയില് ആദ്യ കാര് പുറത്തിറക്കുമെന്ന് പ്രതീക്ഷിക്കുന്നു.
ഇലക്ട്രിക് വാഹന (ഇവി) നയത്തിലൂടെ ആഗോള വാഹന നിര്മ്മാതാക്കളെ ആകര്ഷിക്കാന് രാജ്യം അടുത്തിടെ നടത്തിയ ശ്രമങ്ങള്ക്കിടയിലാണ് ഇത് സംഭവിക്കുന്നത്.
ടെസ്ല പോലുള്ള പ്രമുഖ വാഹന നിര്മ്മാതാക്കളെ ആകര്ഷിക്കുന്നതിനായി 2024 മാര്ച്ചില് ഇന്ത്യ ഒരു മുന്നിര ഇലക്ട്രിക് വാഹന നയം അവതരിപ്പിച്ചിരുന്നു. നിര്മാണ പ്രതിബദ്ധതകള്ക്ക് പകരമായി ഇറക്കുമതി തീരുവയില് കുറവ് വാഗ്ദാനം ചെയ്തു. ഈ നയം പ്രകാരം, കമ്പനികള്ക്ക് 15 ശതമാനം കുറഞ്ഞ തീരുവയില് പ്രതിവര്ഷം 8,000 ഇലക്ട്രിക് വാഹനങ്ങള് വരെ ഇറക്കുമതി ചെയ്യാന് കഴിയും.
മൂന്ന് വര്ഷത്തിനുള്ളില് പ്രാദേശിക ഉല്പ്പാദനം സ്ഥാപിക്കുന്നതിന് അവര് കുറഞ്ഞത് 4,150 കോടി രൂപ (ഏകദേശം 500 മില്യണ് ഡോളര്) നിക്ഷേപിക്കുകയാണെങ്കില്. പദ്ധതിക്കുള്ള അപേക്ഷകള് ഉടന് തുറക്കുമെന്നും 2026 മാര്ച്ച് 15 വരെ സജീവമായി തുടരുമെന്നും പ്രതീക്ഷിക്കുന്നു.
ലോകത്തിലെ മൂന്നാമത്തെ വലിയ കാര് വിപണിയായ ഇന്ത്യയെ വൈദ്യുത വാഹന നിക്ഷേപത്തിനുള്ള ഒരു പ്രധാന ലക്ഷ്യസ്ഥാനമാക്കി മാറ്റുക എന്നതാണ് ഈ നയത്തിന്റെ ലക്ഷ്യം.
പദ്ധതിക്ക് കീഴിലുള്ള യോഗ്യതാ മാനദണ്ഡങ്ങള് കേന്ദ്രസര്ക്കാര് അടുത്തിടെ കര്ശനമാക്കിയിരുന്നു. ടെസ്ല നിലവില് നിരവധി ആഗോള വെല്ലുവിളികള് നേരിടുന്ന സമയമാണിത്. 2025 ന്റെ ആദ്യ പാദത്തില്, കമ്പനിയുടെ ആഗോള വാഹന ഡെലിവറിയില് 13 ശതമാനം ഇടിവും അറ്റാദായത്തില് 71 ശതമാനം ഇടിവും രേഖപ്പെടുത്തി. ഒരു ദശാബ്ദത്തിനിടയിലെ ആദ്യത്തെ വാര്ഷിക ഡെലിവറി ഇടിവാണിത്.
അതേസമയം മെഴ്സിഡസ് ബെന്സ്, സ്കോഡ-ഫോക്സ്വാഗണ്, ഹ്യുണ്ടായ്, കിയ എന്നിവയുള്പ്പെടെ ആഗോള കമ്പനികള് ഇന്ത്യയില് ഇലക്ട്രിക് കാറുകള് നിര്മിക്കാന് താല്പ്പര്യം പ്രകടിപ്പിച്ചിട്ടുണ്ട്.