ഇന്ത്യ-യുകെ വ്യാപാര കരാര് വാഹനമേഖലക്ക് നേട്ടമാകുമോ?
- ഇറക്കുമതി തീരുവ ക്രമേണ കുറയ്ക്കും
- താരിഫ് 100 ശതമാനത്തില് നിന്ന് 10 ശതമാനമായാണ് കുറയുക
ഇന്ത്യ-യുകെ വ്യാപാര കരാര് ഒപ്പിട്ടതോയെ അത് വാഹനമേഖലയ്ക്ക് നേട്ടമാകുമോ എന്നത് ചര്ച്ചാവിഷയമാകുന്നു. ഇവിടെ തീരുവ ഇളവുകള് വളരെ സൂക്ഷ്മതയുള്ളതായി വിലയിരുത്തപ്പെടുന്നു. എഞ്ചിന് ശേഷിയും വാഹന വിലകളുമായി ബന്ധപ്പെട്ട ഇളവുകളും ക്വാട്ടകളും ഇതില് ഉള്പ്പെടുന്നുവെന്ന് ഉദ്യോഗസ്ഥര് സൂചിപ്പിക്കുന്നു.
യുകെയുമായുള്ള കരാറില് ഇന്ത്യ തങ്ങളുടെ സെന്സിറ്റീവ് മേഖലകളെ സംരക്ഷിക്കുന്നതിന് മതിയായ സുരക്ഷാ സംവിധാനങ്ങള് ഉള്പ്പെടുത്തിയിട്ടുണ്ട്. ഓട്ടോമൊബൈല് വിഭാഗത്തില് ഇറക്കുമതി തീരുവ 10-15 വര്ഷത്തിനുള്ളില് കുറയ്ക്കുമെന്ന് ഉദ്യോഗസ്ഥര് പറഞ്ഞു
മെയ് 6 ന് ഇന്ത്യയും യുകെയും വ്യാപാര കരാറിനായുള്ള ചര്ച്ചകള് അവസാനിപ്പിച്ചതായി പ്രഖ്യാപിച്ചു. ഈ കരാര് പ്രകാരം ഇന്ത്യന് കയറ്റുമതിയുടെ 99 ശതമാനത്തിന്റെയും താരിഫ് കുറയ്ക്കുകയും ബ്രിട്ടീഷ് കമ്പനികള്ക്ക് ഇന്ത്യയിലേക്ക് വിസ്കി, കാറുകള്, മറ്റ് ഉല്പ്പന്നങ്ങള് എന്നിവ കയറ്റുമതി ചെയ്യുന്നത് എളുപ്പമാക്കുകയും ചെയ്യും.
2030 ആകുമ്പോഴേക്കും ഇരുവശങ്ങളിലേക്കുമുള്ള വാണിജ്യം നിലവിലുള്ള 60 ബില്യണ് യുഎസ് ഡോളറില് നിന്ന് ഇരട്ടിയാക്കുക എന്നതാണ് ലക്ഷ്യം.
ഇരുവശത്തുമുള്ള ക്വാട്ടകള്ക്ക് കീഴിലുള്ള ഓട്ടോമോട്ടീവ് ഇറക്കുമതിയുടെ താരിഫ് 100 ശതമാനത്തില് നിന്ന് 10 ശതമാനമായി കുറയ്ക്കും, ഇത് ടാറ്റ-ജെഎല്ആര് പോലുള്ള കമ്പനികള്ക്ക് ഗുണം ചെയ്യും.
കരാര് ഭാവിയിലെ കാറുകള്ക്ക് ഗുണം ചെയ്യുമെന്നും ആഗോള കാറുകളും ആഗോള വിലകളും വളരെ വേഗത്തില് ആക്സസ് ചെയ്യാന് ഉപഭോക്താക്കള്ക്ക് പ്രാപ്തമാക്കുമെന്നും ടാറ്റ മോട്ടോഴ്സ് ഗ്രൂപ്പ് സിഎഫ്ഒ പി ബി ബാലാജി നേരത്തെ പറഞ്ഞിരുന്നു. ജെഎല്ആറിന്റെ ഇന്ത്യയിലെ പ്രകടനം മുന്നോട്ട് കൊണ്ടുപോകുന്നതിന് ഈ കരാര് നല്ല സൂചന നല്കുമെന്ന് അദ്ദേഹം നേരത്തെ പറഞ്ഞിരുന്നു.
മറുവശത്ത്, മെഴ്സിഡസ് ബെന്സും ബിഎംഡബ്ല്യുവും എഫ്ടിഎയെ ഒരു നല്ല സംഭവവികാസമായി വിശേഷിപ്പിച്ചപ്പോള്, രാജ്യത്തെ ആഡംബര കാറുകളുടെ വിലയില് ഇത് വലിയ സ്വാധീനം ചെലുത്തില്ലെന്ന് ചൂണ്ടിക്കാട്ടി.