വെര്ച്ച്വല് കേരള ട്രാവല് മാര്ട്ടിന് നാളെ തുടക്കും
- നാല് ദിവസം നീണ്ട് നില്ക്കുന്ന പരിപാടി
കൊച്ചി: ടൂറിസം മേഖലയിലെ രാജ്യത്തെ ഏറ്റവും വലിയ ബയര്-സെല്ലര് മേളയായ കേരള ട്രാവല് മാര്ട്ടിന്റെ (കെടിഎം) രണ്ടാം വെര്ച്വല് പതിപ്പ് നാളെ മുതല് ഈ മാസം 12 വരെ നടക്കും. ടൂറിസം മന്ത്രി പിഎ മുഹമ്മദ് റിയാസ് വീഡിയോ കോണ്ഫറന്സിംഗിലൂടെ ഉദ്ഘാടനം ചെയ്യും. ചടങ്ങില് ധനമന്ത്രി കെ.എന്. ബാലഗോപാല് മുഖ്യപ്രഭാഷണവും നിയമ കയര് വ്യവസായ മന്ത്രി പി. രാജീവ് വിശിഷ്ടാതിഥിയുമായിരിക്കും.
കെടിഎം സൊസൈറ്റി സംഘടിപ്പിക്കുന്ന മീറ്റ് ഡിജിറ്റല് സാധ്യതകള് പ്രയോജനപ്പെടുത്തി ലോകമെമ്പാടുമുള്ള വ്യാപാര പങ്കാളികളിലേക്കും വിനോദസഞ്ചാരികളിലേക്കും പരിപാടിയുടെ ഭാഗമാക്കാന് അവസരമൊരുക്കും. ബിസിനസ് മീറ്റുകള്ക്ക് പുറമേ ലോകമെമ്പാടുമുള്ള ടൂറിസം മേഖലയിലെ ഏറ്റവും പുതിയ പ്രവണതകളെക്കുറിച്ചും പ്രധാന ടൂറിസം ഡെസ്റ്റിനേഷന് എന്ന നിലയില് കേരളത്തിന്റെ സ്ഥാനത്തെക്കുറിച്ചും മീറ്റില് ചര്ച്ചകള് നടക്കും. ഉദ്യോഗസ്ഥരുടെയും വിദഗ്ധരുടെയും ടൂറിസം പങ്കാളികളുടെയും നേതൃത്വത്തില് സുപ്രധാന വിഷയങ്ങളില് സെമിനാറുകളും നടക്കും.
കേരള ടൂറിസം പ്രിന്സിപ്പല് സെക്രട്ടറി കെഎസ് ശ്രീനിവാസ് അധ്യക്ഷത വഹിക്കുന്ന ഉദ്ഘാടന സെഷനില് ടൂറിസം ഡയറക്ടര് പിബി നൂഹ് ആമുഖപ്രഭാഷണം നടത്തും. കെടിഎം പ്രസിഡന്റ് ബേബി മാത്യു സ്വാഗതവും കെടിഎം സെക്രട്ടറി ജോസ് പ്രദീപ് നന്ദിയും പറയും.
രണ്ടു വര്ഷത്തിലൊരിക്കല് നടക്കുന്ന കെടിഎമ്മിന്റെ കഴിഞ്ഞ പതിപ്പ് കൊച്ചിയിലാണ് നടന്നത്. വിവിധ ലോകരാജ്യങ്ങളില് നിന്നുള്ള പ്രതിനിധികളുടെയും പങ്കാളികളുടെയും വന് പങ്കാളിത്തമുണ്ടായിരുന്ന ഈ പതിപ്പിന്. കോവിഡിനു ശേഷം കേരളത്തിന്റെ വിനോദസഞ്ചാര മേഖലയുടെ വളര്ച്ചയെ കാണിക്കുന്നതായിരുന്നു ഇത്.
2021 മാര്ച്ചില് നടന്ന കെടിഎമ്മിന്റെ ആദ്യ വെര്ച്ച്വല് പതിപ്പില് 44,500 ബിസിനസ് മീറ്റിംഗുകളും ഓണ്ലൈന് ചര്ച്ചകളും നടന്നു. കോവിഡ് മൂലമുണ്ടായ സാമ്പത്തിക മാന്ദ്യത്തെ മറികടക്കാനുള്ള തന്ത്രങ്ങള് വികസിപ്പിക്കാന് യാത്രാ വ്യവസായത്തെ പ്രാപ്തമാക്കുന്നതായിരുന്നു ഈ മീറ്റ്.
കേരള ടൂറിസത്തിന്റെ വിപണന തന്ത്രങ്ങളില് മികച്ച സംഭാവന നല്കിയ കെടിഎമ്മിന്റെ ആദ്യ പതിപ്പില് പുതിയ ടൂറിസം ഉത്പന്നങ്ങളും അനുഭവങ്ങളും ലോകത്തിന് മുന്നില് പ്രദര്ശിപ്പിക്കാനും കേരളത്തിന്റെ ടൂറിസം മേഖലയുടെ പുനര്നിര്മ്മാണത്തെ സഹായിക്കാനും കഴിഞ്ഞുവെന്ന് ബേബി മാത്യു അഭിപ്രായപ്പെട്ടു.
2000 ല് രൂപീകരിച്ച കെടിഎം സൊസൈറ്റി ട്രാവല് ആന്ഡ് ടൂറിസം മേഖലയിലെ രാജ്യത്തെ ഏറ്റവും വലിയ സ്ഥാപനമാണ്.