അവയവദാനം ഏകോപിപ്പിക്കുന്നതിന് പുതിയ വെബ്സൈറ്റുമായി കെ-സോട്ടോ
- അവയവദാനവുമായി ബന്ധപ്പെട്ട എല്ലാ വിവരങ്ങളും വെബ്സൈറ്റില് ലഭ്യമാണ്.
സംസ്ഥാനത്തെ മരണാനന്തര അവയവദാന പദ്ധതി കൈകാര്യം ചെയ്യുന്ന കേരള സ്റ്റേറ്റ് ഓര്ഗന് ആന്ഡ് ടിഷ്യൂ ട്രാന്സ്പ്ലാന്റ് ഓര്ഗനൈസേഷന്റെ (കെ-സോട്ടോ) ഔദ്യോഗിക വെബ്സൈറ്റ് ആരോഗ്യ വകുപ്പ് മന്ത്രി വീണാ ജോര്ജ് പുറത്തിറക്കി. എന്ഐസിയും സി-ഡിറ്റും സംയുക്തമായാണ് വെബ്സൈറ്റ് തയ്യാറാക്കിയത്.
അവയവദാനവുമായി ബന്ധപ്പെട്ട എല്ലാ പ്രവര്ത്തനങ്ങളും ഒരു കേന്ദ്രീകൃത പ്ലാറ്റ്ഫോമില് ലഭ്യമാക്കുകയാണ് പുതിയ വെബ്സൈറ്റലൂടെ ലക്ഷ്യമിടുന്നതെന്ന് മന്ത്രി പറഞ്ഞു.
അവയവദാന മേഖലയിലും അവയവമാറ്റ ശസ്ത്രക്രിയ ഉള്പ്പെടെയുള്ള കാര്യങ്ങളിലും സുതാര്യത ഉറപ്പുവരുത്താന് ഈ വെബ്സൈറ്റിലൂടെ സാധിക്കും.
അവയവദാനം പ്രോത്സാഹിപ്പിക്കുന്നതോടൊപ്പം അവയവ കച്ചവട താത്പര്യങ്ങള് അവസാനിപ്പിക്കുന്നതിനും സുതാര്യമാക്കാനും വേണ്ടിയാണ് കെ-സോട്ടോ ആരംഭിച്ചത്. പുതിയ വെബ്സൈറ്റിലൂടെ സംസ്ഥാന തലത്തില് കൃത്യമായി മോണിറ്റര് ചെയ്യാനും ഏകോപിപ്പിക്കാനും സാധിക്കും. അവയവ ദാനവുമായി ബന്ധപ്പെട്ട് പൊതുജനങ്ങള്ക്ക് ആവശ്യമായ എല്ലാ വിവരങ്ങളും https://ksotto.kerala.gov.in/ ലഭ്യമാക്കുമെന്നും മന്ത്രി വ്യക്തമാക്കി.
പൊതുജനങ്ങള്ക്ക് അവയവദാനത്തെക്കുറിച്ചുള്ള എല്ലാ വിവരങ്ങളും ലഭ്യമാകുന്ന പബ്ലിക് ഇന്റര്ഫേസും അവയവങ്ങള് രജിസ്റ്റര് ചെയ്യുന്നതിന് രോഗികള്ക്ക് അവര് ചികിത്സ തേടുന്ന ആശുപത്രി വഴി രജിസ്റ്റര് ചെയ്യുന്നതിനുള്ള ഹോസ്പിറ്റല് ലോഗിനുമുണ്ട്. മരണശേഷം അവയവം ദാനം ചെയ്യുന്നതിനുള്ള സമ്മതപത്രം സമര്പ്പിക്കുന്നതിനും അതിനുള്ള രേഖയായ ഡോണര് കാര്ഡ് പ്രിന്റ് ചെയ്തെടുക്കുന്നതിനുമുള്ള സൗകര്യമുണ്ട്. സംശയ നിവാരണത്തിനുള്ള എഫ്എക്യൂ വിഭാഗവുമുണ്ട്.
അവയവദാനവുമായി ബന്ധപ്പെട്ട പ്രധാന നിയമങ്ങള്, ചട്ടങ്ങള്, സര്ക്കാര് ഉത്തരവുകള്, സര്കുലറുകള്, പ്രധാന പ്രോട്ടോകോളുകള്, സ്റ്റാന്ഡേര്ഡ് ഓപ്പറേറ്റിംഗ് പ്രോസീജിയറുകള് എന്നിവ വെബ്സൈറ്റില് ലഭ്യമാണ്. കെ-സോട്ടോയുടെ ഭരണപരമായ വിവരങ്ങള്, വിവരാവകാശം എന്നിവയും വൈബ് സൈറ്റില് ലഭ്യമാണ്.