ഇന്ത്യയുമായി കൂടുതല് മികച്ച സാമ്പത്തിക ബന്ധത്തിന് ചൈന
- കൂടുതല് പ്രീമിയം ഇന്ത്യന് കയറ്റുമതികളെ ചൈന സ്വാഗതം ചെയ്യുന്നു
- ചൈനയില് ഗണ്യമായ നിക്ഷേപ സാധ്യതകള്
ചൈന ഇന്ത്യയുമായി കൂടുതല് ആഴത്തിലുള്ള സാമ്പത്തിക ബന്ധങ്ങളിലേക്ക് നീങ്ങുന്നു. യുഎസിന്റെ താരിഫിനെ മറികടക്കുന്നതിന്റെ തന്ത്രത്തിന്റെ ഭാഗമാണിതെന്ന് വിലയിരുത്തപ്പെടുന്നു. കൂടുതല് പ്രീമിയം ഇന്ത്യന് കയറ്റുമതികളെ ചൈന സ്വാഗതം ചെയ്യുന്നുവെന്ന് ഇന്ത്യയിലെ ചൈനീസ് അംബാസഡര് സൂ ഫെയ്ഹോങ് അഭിപ്രായപ്പെട്ടത് ഇതന്റെ അടിസ്ഥാനത്തിലെന്നാണ് കരുതുന്നത്. ചെനയുടെ ഉപഭോക്തൃ വിപണിയില് നേട്ടമുണ്ടാക്കുന്നതിന് ഇന്ത്യന് ബിസിനസുകളെ പിന്തുണയ്ക്കുമെന്നും ഫെയ്ഹോങ് പറഞ്ഞു.
'ചൈന-ഇന്ത്യ സാമ്പത്തിക, വ്യാപാര ബന്ധങ്ങളുടെ സത്ത പരസ്പര നേട്ടവും വിന്-വിന് സഹകരണവുമാണ്. ചൈന ഒരിക്കലും മനഃപൂര്വ്വം വ്യാപാര മിച്ചം പിന്തുടര്ന്നിട്ടില്ല. വ്യാപാര മിച്ചം വിപണി നയിക്കുന്ന കാര്യക്ഷമതയെ പ്രതിഫലിപ്പിക്കുകയും മാറിക്കൊണ്ടിരിക്കുന്ന സാമ്പത്തിക സാഹചര്യങ്ങള്ക്കനുസരിച്ച് വികസിക്കുകയും ചെയ്യുന്നു,' ടൈംസ് ഓഫ് ഇന്ത്യയ്ക്ക് നല്കിയ പ്രത്യേക അഭിമുഖത്തില് ഫെയ്ഹോങ് പറഞ്ഞു.
ചൈനയില് ഗണ്യമായ നിക്ഷേപ സാധ്യതകള് ഉണ്ടെന്ന് പ്രസിഡന്റ് ഷി ജിന്പിംഗ് അടുത്തിടെ ആഗോള ബിസിനസ് നേതാക്കളോട് നടത്തിയ പ്രസംഗം ഉദ്ധരിച്ച് പ്രതിനിധി എടുത്തുപറഞ്ഞു. 'ലോകത്തിലെ രണ്ടാമത്തെ വലിയ ഉപഭോക്തൃ വിപണിയും ഏറ്റവും വലിയ ഇടത്തരം വരുമാന ഗ്രൂപ്പുമായ ചൈന നിക്ഷേപത്തിനും ഉപഭോഗത്തിനും വലിയ സാധ്യതകള് വാഗ്ദാനം ചെയ്യുന്നു. ചൈനയുടെ സൂപ്പര്-സൈസ്ഡ് വിപണിയെ വിലമതിക്കുന്നത് ഇന്ത്യന് കമ്പനികള്ക്ക് കൂടുതല് വാണിജ്യ അവസരങ്ങള് തുറക്കും,' അദ്ദേഹം പറഞ്ഞു.
2024 സാമ്പത്തിക വര്ഷത്തില്, മുളക്, ഇരുമ്പയിര്, പരുത്തി നൂല് തുടങ്ങിയ ഇന്ത്യന് കയറ്റുമതി ചൈനീസ് വിപണിയില് ശ്രദ്ധേയമായ വളര്ച്ച കൈവരിച്ചു. വിപണി പ്രവേശനവുമായി ബന്ധപ്പെട്ട ചൈനയുടെ ആശങ്കകള് പരിഹരിക്കാന് അദ്ദേഹം ന്യൂഡല്ഹിയോട് ആവശ്യപ്പെട്ടു. 'സാമ്പത്തിക, വ്യാപാര മേഖലയിലെ ചൈനയുടെ ആശങ്കകള് ഇന്ത്യ ഗൗരവമായി കാണുമെന്നും, ചൈനീസ് സംരംഭങ്ങള്ക്ക് ന്യായവും സുതാര്യവും വിവേചനരഹിതവുമായ ഒരു ബിസിനസ് അന്തരീക്ഷം നല്കുമെന്നും ഞങ്ങള് പ്രതീക്ഷിക്കുന്നു,' അദ്ദേഹം കൂട്ടിച്ചേര്ത്തു.
യുഎസ് തീരുവകള് വര്ധിപ്പിക്കുമ്പോള്, ബെയ്ജിംഗിന്റെ ഇന്ത്യയിലേക്കുള്ള ശ്രദ്ധ അതിന്റെ സാമ്പത്തിക തന്ത്രത്തിലെ സാധ്യതയുള്ള മാറ്റത്തെ സൂചിപ്പിക്കുന്നു. വ്യാപാര പങ്കാളിത്തങ്ങള് വൈവിധ്യവല്ക്കരിക്കാനും വര്ദ്ധിച്ചുവരുന്ന ശത്രുതാപരമായ പാശ്ചാത്യ വിപണികളെ ആശ്രയിക്കുന്നത് കുറയ്ക്കാനും ചൈന ലക്ഷ്യമിടുന്നു.