ഇന്ത്യ ഈ വര്‍ഷം നാലാമത്തെ സമ്പദ് വ്യവസ്ഥയാകുമെന്ന് ഐഎംഎഫ്

ഈ വര്‍ഷം ജപ്പാനെ മറികടന്ന് ഇന്ത്യ ലോകത്തിലെ നാലാമത്തെ വലിയ സമ്പദ്വ്യവസ്ഥയായി മാറുമെന്ന് അന്താരാഷ്ട്ര നാണയ നിധി. ഇന്ത്യയുടെ ജിഡിപി 4,187.02 ബില്യണ്‍ ഡോളറിലെത്തുമെന്നും ഐഎംഎഫ് കണക്കാക്കുന്നു.

അന്താരാഷ്ട്ര നാണയ നിധിയുടെ (ഐഎംഎഫ്) ഏറ്റവും പുതിയ വേള്‍ഡ് ഇക്കണോമിക് ഔട്ട്ലുക്ക് റിപ്പോര്‍ട്ട് പ്രകാരം, 2028 ആകുമ്പോഴേക്കും ഇന്ത്യ ജര്‍മ്മനിയെ മറികടന്ന് ലോകത്തിലെ മൂന്നാമത്തെ വലിയ സമ്പദ്വ്യവസ്ഥയായി മാറും. അപ്പോഴേക്കും ഇന്ത്യയുടെ ജിഡിപി 5,584.48 ബില്യണ്‍ ഡോളറായി വളരുമെന്ന് പ്രതീക്ഷിക്കുന്നു. അതേസമയം ജര്‍മ്മനിയുടെ ജിഡിപി 5,251.93 ബില്യണ്‍ ഡോളറായിരിക്കുമെന്ന് കണക്കാക്കപ്പെടുന്നു.

ഈ വളര്‍ച്ച ഉണ്ടാകുമ്പോഴും ആഗോള സമ്പദ് വ്യവസ്ഥയിലെ ആദ്യ രണ്ട് സ്ഥാനങ്ങള്‍ 2025-ല്‍ അമേരിക്കയും ചൈനയും തന്നെയായിരിക്കും. യുഎസിന്റെ ജിഡിപി 30.5 ട്രില്യണ്‍ ഡോളറായിരിക്കുമെന്ന് പ്രതീക്ഷിക്കുന്നു. അതേസമയം ചൈനയുടെ സമ്പദ് വ്യവസ്ഥ 19.2 ട്രില്യണ്‍ ഡോളറിലെത്തുമെന്ന് പ്രതീക്ഷിക്കുന്നു. ഈ രണ്ട് രാജ്യങ്ങളും ഈ ദശാബ്ദത്തിന്റെ ശേഷിക്കുന്ന കാലയളവില്‍ ലോകത്തിലെ ഏറ്റവും വലിയ സമ്പദ്വ്യവസ്ഥകളായി തുടരാന്‍ സാധ്യതയുണ്ട്.

ആഗോള സാമ്പത്തിക വ്യവസ്ഥയിലെ മാറ്റത്തെക്കുറിച്ചും ഐഎംഎഫ് റിപ്പോര്‍ട്ട് പറയുന്നു. 80 വര്‍ഷത്തിലേറെ സ്ഥിരത പുലര്‍ത്തിയ ശേഷം, ലോക സമ്പദ്വ്യവസ്ഥ ഇപ്പോള്‍ ഒരു പുതിയ ഘട്ടത്തിലേക്ക് കടക്കുകയാണ്. ഒരു പുതിയ ആഗോള സാമ്പത്തിക ക്രമം ഉയര്‍ന്നുവരികയാണെന്നും, ഇതില്‍ ഇന്ത്യയ്ക്ക് പ്രധാന പങ്ക് വഹിക്കാനാകുമെന്നും റിപ്പോര്‍ട്ട് സൂചിപ്പിക്കുന്നു.