പരുത്തിയുടെ ഇറക്കുമതി തീരുവ താല്‍ക്കാലികമായി നിര്‍ത്തിവെച്ചു

പരുത്തിയുടെ ഇറക്കുമതി തീരുവ കേന്ദ്രം നിര്‍ത്തിവെച്ചു. പരുത്തിയുടെ ഇറക്കുമതി തീരുവ 11ശതമാനമാണ്. ഓഗസ്റ്റ് 19 മുതല്‍ അടുത്തമാസം 30 വരെയാണ് ഇറക്കുമതി തീരുവ ഒഴിവാക്കിയിട്ടുള്ളത്. പ്രധാന വിപണികളിലെ വിലക്കയറ്റവും ഉയര്‍ന്ന താരിഫുകളും മൂലം ബുദ്ധിമുട്ടുന്ന തുണിമില്ലുകളെയും കയറ്റുമതിക്കാരെയും പിന്തുണയ്ക്കുക എന്ന ലക്ഷ്യത്തോടെയാണ് നടപടി.

മേഖലയെ കൂടുതല്‍ മത്സരാധിഷ്ഠിതമാക്കുന്നതിനായി തീരുവ പിന്‍വലിക്കണമെന്ന് സര്‍ക്കാരില്‍ സമ്മര്‍ദ്ദം ചെലുത്തിയ കോണ്‍ഫെഡറേഷന്‍ ഓഫ് ഇന്ത്യന്‍ ടെക്‌സ്‌റ്റൈല്‍ ഇന്‍ഡസ്ട്രി (സിഐടിഐ) ഉള്‍പ്പെടെയുള്ള വ്യവസായ ഗ്രൂപ്പുകളുടെ ആവശ്യത്തെ തുടര്‍ന്നാണ് ഇളവ്.

ഇന്ത്യയുടെ വസ്ത്ര വ്യവസായം അമേരിക്കയിലേക്കുള്ള കയറ്റുമതിക്ക് 50% താരിഫ് നേരിടുകയാണ്. ബംഗ്ലാദേശിനും വിയറ്റ്‌നാമിനും 20% ഉം ചൈനയ്ക്ക് 30% ഉം ആയി യുഎസ് താരിഫ് നിരക്ക് താരതമ്യം ചെയ്യുമ്പോള്‍, ഇന്ത്യന്‍ കയറ്റുമതി വാങ്ങുന്നവര്‍ക്ക് അത്ര ആകര്‍ഷകമല്ല.

തീരുവ രഹിത പരുത്തി ഇറക്കുമതി സെപ്റ്റംബറിനു ശേഷവും സര്‍ക്കാര്‍ നീട്ടുമെന്ന് വ്യവസായ ഉദ്യോഗസ്ഥര്‍ പ്രതീക്ഷിക്കുന്നു.

'ഉയര്‍ന്ന ഇന്‍പുട്ട് ചെലവ് നേരിടുന്ന മില്ലുകളെ ഈ ഇളവ് സഹായിക്കുമെന്നും മത്സരക്ഷമതയില്‍ ബുദ്ധിമുട്ടുന്ന നൂല്‍, തുണി കയറ്റുമതിക്കാരെ പിന്തുണയ്ക്കുമെന്നും പ്രതീക്ഷിക്കുന്നു, പ്രത്യേകിച്ച് ഇന്ത്യയുടെ ഉത്സവ സീസണിന് മുന്നോടിയായി,' ഗ്ലോബല്‍ ട്രേഡ് റിസര്‍ച്ച് ഇനിഷ്യേറ്റീവ് (ജിടിആര്‍ഐ) സ്ഥാപകനായ അജയ് ശ്രീവാസ്തവ പറഞ്ഞു.

'ആഭ്യന്തര പരുത്തി വിലയില്‍ തുടര്‍ച്ചയായ ഇടിവ് ഒഴിവാക്കാന്‍ സര്‍ക്കാര്‍ ആശ്വാസം 40 ദിവസത്തേക്ക് പരിമിതപ്പെടുത്തി. ഇത് കര്‍ഷകരെ ദോഷകരമായി ബാധിച്ചേക്കാം. പുതിയ വിള വരുന്നതിനുമുമ്പ് വിപണികളെ സ്ഥിരപ്പെടുത്തുന്നതിനുള്ള സമയബന്ധിതമായ ഒരു ഇടവേള എന്ന നിലയിലാണ് ഈ നടപടി,' ശ്രീവാസ്തവ പറഞ്ഞു.

ഇന്ത്യയിലെ വസ്ത്ര വ്യവസായം ഇതിനകം തന്നെ തൊഴിലാളി ക്ഷാമവും പരിമിതമായ ഉല്‍പാദന ശേഷിയും നേരിടുന്നു. കയറ്റുമതിക്കാര്‍ ഉല്‍പ്പാദനം വിദേശത്തേക്ക് മാറ്റുന്നതിനെക്കുറിച്ച് ആലോചിക്കുന്നു. 2030 ആകുമ്പോഴേക്കും രാജ്യത്തിന്റെ തുണി വ്യവസായം 350 ബില്യണ്‍ ഡോളറായി വികസിപ്പിക്കാനാണ് സര്‍ക്കാര്‍ ലക്ഷ്യമിടുന്നത്. ഇതില്‍ 100 ബില്യണ്‍ ഡോളറിന്റെ കയറ്റുമതിയും ഉള്‍പ്പെടുന്നു. നിലവിലെ വിപണി വലുപ്പം 180 ബില്യണ്‍ ഡോളറാണ്.