ചൈനക്കാര് വേണമെന്നില്ല; ഐഫോണ് നിര്മാണം കൂടുതല് ഉഷാറായെന്ന് റിപ്പോര്ട്ട്
രാജ്യത്ത് ഐഫോണ് 17 പ്രൊഡക്ഷന് ഫോക്സ്കോണ് വര്ധിപ്പിക്കുന്നു
ചൈനീസ് ജീവനക്കാരെ പിന്വലിച്ചത് ഐഫോണ് അസംബ്ലര് ഫോക്സ്കോണിന്റെ ഇന്ത്യയിലെ പ്രവര്ത്തനങ്ങളെ ബാധിച്ചിട്ടില്ലെന്ന് റിപ്പോര്ട്ട്. ഇന്ത്യയില് ഫോക്സ്കോണിന്റെ പ്രവര്ത്തനങ്ങള്ക്ക് കാര്യമായ തടസ്സമുണ്ടാകുമെന്ന് പ്രതീക്ഷിക്കുന്നില്ലെന്ന് ഇലക്ട്രോണിക്സ് ആന്ഡ് ഇന്ഫര്മേഷന് ടെക്നോളജി മന്ത്രാലയ സെക്രട്ടറി എസ്. കൃഷ്ണന് മാധ്യമപ്രവര്ത്തകരോട് പറഞ്ഞു.
'കഴിഞ്ഞ അഞ്ച് വര്ഷമായി ഫോക്സ്കോണ് ചെന്നൈയ്ക്കടുത്തുള്ള അവരുടെ പ്ലാന്റിലാണ് പ്രവര്ത്തിക്കുന്നത്, ബെംഗളൂരുവിനടുത്ത് ഒരു പുതിയ പ്ലാന്റ് വരാനിരിക്കുന്നു. അതിനാല് അവര്ക്ക് അവിടത്തെ ചില തൊഴിലാളികളെയും, തായ്വാനില് നിന്നുള്ള ചിലരെയും, അമേരിക്കയില് നിന്നുള്ള ചിലരെയും ഉപയോഗിച്ച് കാര്യങ്ങള് കൈകാര്യം ചെയ്യാന് കഴിഞ്ഞു,' തായ്വാനില് ഒരു വ്യാപാര പ്രദര്ശനം സന്ദര്ശിക്കുന്നതിനിടെ കൃഷ്ണന് പറഞ്ഞു.
ഹോണ് ഹായ് പ്രിസിഷന് ഇന്ഡസ്ട്രി എന്നറിയപ്പെടുന്ന ഫോക്സ്കോണ്, ചൈനയിലെ മെയിന്ലാന്ഡിലുള്ള നൂറുകണക്കിന് എഞ്ചിനീയര്മാരോടും ടെക്നീഷ്യന്മാരോടും ഇന്ത്യയിലെ പ്രവര്ത്തനങ്ങളില് നിന്ന് നാട്ടിലേക്ക് മടങ്ങാന് ആവശ്യപ്പെട്ടതായി ജൂലൈയില് ബ്ലൂംബെര്ഗ് ന്യൂസ് റിപ്പോര്ട്ട് ചെയ്തിരുന്നു.
ഇന്ത്യക്കെതിരായ താരിഫ് അമേരിക്ക ലഘൂകരിക്കാത്ത സാഹചര്യത്തിലും ഫോക്സ്കോണും അതിന്റെ ക്ലയന്റ് ആപ്പിളും ഇന്ത്യയില് ഐഫോണ് ഉത്പാദനം വര്ദ്ധിപ്പിക്കാന് ശ്രമിക്കുകയാണ്.
ആപ്പിളിനായി ഫോക്സ്കോണ് നിര്മിക്കുന്ന മിക്ക ഐഫോണുകളും ചൈനയിലാണ് അസംബിള് ചെയ്യുന്നത്. ചൈനയില് നിന്നുള്ള ജീവനക്കാരോട് നാട്ടിലേക്ക് മടങ്ങാന് ആവശ്യപ്പെട്ടത് എന്തുകൊണ്ടാണെന്ന് വ്യക്തമല്ലെന്ന് കൃഷ്ണന് പറഞ്ഞു.
2020-ല് തര്ക്കമുള്ള അതിര്ത്തിയില് നടന്ന സൈനിക ഏറ്റുമുട്ടലിനെത്തുടര്ന്നാണ് ഇന്ത്യ-ചൈന ബന്ധം വഷളായത്. തുടര്ന്ന് ഇന്ത്യ ചൈനീസ് നിക്ഷേപങ്ങള്ക്ക് നിയന്ത്രണങ്ങള് ഏര്പ്പെടുത്തുകയും നൂറുകണക്കിന് ജനപ്രിയ ചൈനീസ് ആപ്പുകള് നിരോധിക്കുകയും ചെയ്തു.
കഴിഞ്ഞ മാസം ചൈന സന്ദര്ശിച്ച ഇന്ത്യന് പ്രധാനമന്ത്രി നരേന്ദ്ര മോദി ചൈനീസ് പ്രസിഡന്റ് ഷി ജിന്പിംഗുമായി ചര്ച്ച നടത്തിയതോടെ, ചൈനയും ഇന്ത്യയും തമ്മിലുള്ള ബന്ധം സമീപ മാസങ്ങളില് ക്രമേണ മെച്ചപ്പെട്ടു.