ഫോണ്പേ ഉപയോക്താക്കള് 60 കോടി കടന്നു
- കമ്പനി ബിസിനസിലേക്ക് പ്രവേശിച്ചതിന്റെ പത്താം വാര്ഷികത്തിലാണ് ഈ നേട്ടം
- രാജ്യത്തെ ഏറ്റവും വലിയ ഫിന്ടെക് സ്ഥാപനമാണ് ഫോണ്പേ
ഫിന്ടെക് കമ്പനിയായ ഫോണ്പേയില് രജിസ്റ്റര് ചെയ്ത ഉപയോക്താക്കളുടെ എണ്ണം 60 കോടി കടന്നു. കമ്പനി ബിസിനസിലേക്ക് പ്രവേശിച്ചതിന്റെ പത്താം വാര്ഷികത്തിലാണ് ഈ നേട്ടം കൈവരിക്കാനായത്. ഇന്ന് രാജ്യത്തെ ഏറ്റവും വലിയ ഫിന്ടെക് സ്ഥാപനമാണ് ഫോണ്പേ.
ബെംഗളൂരു ആസ്ഥാനമായ കമ്പനി ഐപിഒയ്ക്ക് തയ്യാറെടുക്കുകയാണ്. കഴിഞ്ഞ 16 മാസത്തിനുള്ളില് ഫോണ്പേ 100 ദശലക്ഷത്തിലധികം ഉപയോക്താക്കളെയാണ് ചേര്ത്തത്.
കമ്പനിക്ക് 40 ദശലക്ഷത്തിലധികം വ്യാപാരികളുടെ അടിത്തറയുണ്ടെന്ന് അവകാശപ്പെടുന്നു. പ്രതിദിനം 33 കോടിയിലധികം ഇടപാടുകള് കൈകാര്യം ചെയ്യുന്നതായും മൊത്തം വാര്ഷിക പേയ്മെന്റ് മൂല്യം 150 ലക്ഷം കോടി രൂപയിലധികം വരുന്നതായും ഫോണ്പേ അവകാശപ്പെടുന്നു.പത്ത് വര്ഷത്തിനുള്ളില്, കമ്പനി അതിന്റെ പ്രവര്ത്തനങ്ങള് മറ്റ് മേഖലകളിലേക്കും വ്യാപിപ്പിച്ചു. 2023 ല് നടന്ന അവസാന ഫണ്ടിംഗ് റൗണ്ടില് കമ്പനിയുടെ മൂല്യം 12 ബില്യണ് യുഎസ് ഡോളറായിരുന്നു.
2025 മാര്ച്ച് വരെ, ഫോണ്പേയ്ക്ക് 60 കോടിയിലധികം രജിസ്റ്റര് ചെയ്ത ഉപയോക്താക്കളും 4 കോടിയിലധികം വ്യാപാരികളിലായി വ്യാപിച്ചുകിടക്കുന്ന ഡിജിറ്റല് പേയ്മെന്റ് സ്വീകാര്യതാ ശൃംഖലയുമുണ്ട്.
ഫോണ്പേ ഗ്രൂപ്പിന്റെ ബിസിനസ് പോര്ട്ട്ഫോളിയോയില് ഇന്ഷുറന്സ്, വായ്പ, സമ്പത്ത് മാനേജ്മെന്റ് തുടങ്ങിയ സാമ്പത്തിക ഉല്പ്പന്നങ്ങളുടെ വിതരണവും ഉള്പ്പെടുന്നു.