സ്വര്‍ണവില വീണ്ടും ഇടിഞ്ഞു; പവന് 43,000ന് താഴേക്കോ?

സംസ്ഥാനത്ത് നാലു ദിവസത്തെ ഇടവേളയ്ക്ക് ശേഷം ഇന്നലെ വീണ്ടും സ്വര്‍ണവില ഇടിവിലേക്ക് നീങ്ങി. ഇന്നലെ 30 രൂപയുടെ ഇടിവാണ് 22 കാരറ്റ് സ്വര്‍ണം ഗ്രാമിന് ഉണ്ടായതെങ്കില്‍ ഇന്ന് വീണ്ടും 20 രൂപയുടെ ഇടിവുണ്ടായി. . 22 കാരറ്റ് സ്വര്‍ണം ഗ്രാമിന്‍റെ വില ഇന്ന് 5385 രൂപയാണ്. പവന് 43,080 രൂപയാണ് വില, ഇന്നലത്തെ വിലയില്‍ നിന്ന് 160 രൂപയുടെ ഇടിവ്. തുടര്‍‌ച്ചയായ അഞ്ചു ദിവസങ്ങളിലെ ഇടിവിന് ശേഷം കഴിഞ്ഞ ശനിയാഴ്ച സ്വര്‍ണ വില ഉയര്‍ന്നിരുന്നു. അതിനു പിന്നാലെ തിങ്കളാഴ്ച വീണ്ടും വില നേരിയ തോതില്‍ ഉയര്‍ന്നു. ചൊവ്വാഴ്ച വിലയില്‍ മാറ്റമുണ്ടായില്ല. 24 കാരറ്റ് സ്വര്‍ണം ഗ്രാമിന് ഇന്ന് 21 രൂപ ഇടിഞ്ഞ് 5,875 രൂപയിലെത്തി. പവന്‍ 168 രൂപയുടെ ഇടിവോടെ 47,000 രൂപയായി

ജൂണ്‍ 15നാണ്, രണ്ടു മാസത്തിലേറേ നീണ്ട കാലയളവിന് ശേഷം 22 കാരറ്റ് സ്വര്‍ണം പവന്‍റെ വില 44,000 രൂപയ്ക്ക് താഴേക്കെത്തിയത്. ഇടയ്ക്ക് വീണ്ടും ഇതിന് മുകളിലേക്ക് പോയെങ്കിലും പിന്നെയും താഴോട്ടേക്ക് വന്ന് മൂന്നുമാസത്തിലെ ഏറ്റവും താഴ്ന്ന നിലയിലേക്ക് വിലയെത്തുകയായിരുന്നു. ഇപ്പോള്‍ വിലയിടിവ് തുടര്‍ന്നാല്‍ വില 43,000 ന് താഴെപ്പോകുമെന്ന സാഹചര്യമാണ് നിലവിലുള്ളത്.  

യുഎസ് നടപ്പു പാദത്തില്‍ ശക്തമായ സാമ്പത്തിക പ്രകടനമാണ് രേഖപ്പെടുത്തുന്നത് എന്ന വിലയിരുത്തലുകളുടെ അടിസ്ഥാനത്തില്‍ ആഗോള തലത്തിലും സ്വര്‍ണവില മൂന്ന് മാസത്തെ താഴ്ന്ന നിലവാരത്തിലേക്ക് എത്തിയിട്ടുണ്ട്. ഫെഡറൽ റിസർവ് ചെയർ ജെറോം പവല്‍ അടിസ്ഥാന പലിശ നിരക്കുകള്‍ വര്‍ധിപ്പിക്കുന്നതിനെ കുറിച്ച് യുഎസ് കോണ്‍ഗ്രസിനു മുമ്പാകെ സൂചന നല്‍കിയത് സ്വര്‍ണത്തിലേക്ക് നിക്ഷേപകരെ ആകര്‍ഷിച്ചിരുന്നുവെങ്കിലും ഇപ്പോള്‍ അതിന്‍റെ പ്രഭ മങ്ങുകയാണ്. നിരക്കു വര്‍ധന സംബന്ധിച്ച് കൂടുതല്‍ വ്യക്തത ലഭിക്കുന്നതിനായി ട്രേഡര്‍മാര്‍ ജാഗ്രതാപൂര്‍ണമായ സമീപനമാണ് കൈക്കൊള്ളുന്നതെന്ന് റോയിട്ടേര്‍സ് റിപ്പോര്‍ട്ട് ചെയ്യുന്നു. ഔണ്‍സിന് 1,903.60 ഡോളര്‍ എന്ന നിലയിലാണ് ഇന്ന് സ്വര്‍ണത്തിന്‍റെ ആഗോള വില്‍പ്പന പുരോഗമിക്കുന്നത്. 

ഏപ്രിലിലും മേയ് തുടക്കത്തിലും സംസ്ഥാനത്തെ സ്വര്‍ണ വില കുതിച്ചുയര്‍ന്നിരുന്നു. ജൂണില്‍ ഏറെ ദിവസങ്ങളിലും ഇടിവാണ് ഉണ്ടായത്. ജൂണില്‍ ഇതുവരെ കേവലും 6 ദിവസങ്ങളില്‍ മാത്രമാണ് സ്വര്‍ണവിലയില്‍ വര്‍ധന രേഖപ്പെടുത്തിയത്. 

വെള്ളി വില പൊതുവില്‍ സ്വര്‍ണ വിലയ്ക്ക് സമാനമായ പ്രവണതയാണ് പ്രകടമാക്കിയിട്ടുള്ളത്. ഇന്ന് വെള്ളിവില ഗ്രാമിന് 40 പൈസയുടെ വര്‍ധനയോടെ 75.30 രൂപയിലെത്തി. 8 ഗ്രാം വെള്ളിയുടെ വില ഇന്ന് 602.40 രൂപയാണ്, ഇന്നലത്തെ വിലയില്‍ നിന്ന് 3.20 രൂപയുടെ ഇടിവാണിത്. ഡോളറിനെതിരേ ഇന്ന് രൂപയുടെ മൂല്യം 1 ഡോളറിന് 82.06 രൂപ എന്ന നിലയിലാണ്. ഡോളര്‍ കരുത്തു പ്രാപിക്കുന്നത് തുടര്‍ന്നാല്‍ ആഭ്യന്തര വപിണിയില്‍ സ്വര്‍ണവിലയുടെ ഇടിവ്  വരും ദിവസങ്ങളിലും തുടരും. എങ്കിലും ഒരു ഹ്രസ്വകാലയളവില്‍ സ്വര്‍ണവില വലിയ താഴ്ചയിലേക്ക് പോകാനുള്ള സാധ്യതയെ വിശകലന വിദഗ്ധര്‍ തള്ളിക്കളയുകയാണ്.

മാര്‍ച്ച് അവസാനത്തോടെ ആരംഭിച്ച് മേയ് തുടക്ക ദിനങ്ങള്‍ വരെ നീണ്ട വിലയിലെ കുതിപ്പിലെ തിരിച്ചിറക്കമാണ് ഇപ്പോള്‍ സംഭവിക്കുന്നതെന്നാണ് ഇവര്‍ ചൂണ്ടിക്കാണിക്കുന്നത്. . മേയ് 5ന് 22 കാരറ്റ് സ്വര്‍ണം ഗ്രാമിന് 5720 രൂപയെന്ന റെക്കോഡ് വില രേഖപ്പെടുത്തിയിരുന്നു. പവന് 45760 രൂപയായിരുന്നു അന്നത്തെ വില. അതുമായി താരതമ്യപ്പെടുത്തുമ്പോള്‍ 22 കാരറ്റ് പവന് 2680 രൂപയുടെ കുറവാണ് ഇന്നത്തെ വിലയിലുള്ളത്.