സ്വര്‍ണ വിലയില്‍ ഇന്ന് ഇടിവ്

സംസ്ഥാനത്തെ സ്വര്‍ണ വില ഇന്ന് വീണ്ടും ഇടിവിലേക്ക് നീങ്ങി. ആറു ദിവസത്തെ ഇടവേളയ്ക്ക് ശേഷം ഇന്നലെ സ്വര്‍ണ വില ഉയര്‍ന്നിരുന്നു. ഈ മാസത്തില്‍ ഭൂരിഭാഗം ദിവസങ്ങളിലും സ്വര്‍ണ വില ഇടിവ് പ്രകടമാക്കിയിരുന്നു.  ഇന്ന് 22 കാരറ്റ് സ്വര്‍ണം ഗ്രാമിന് 15 രൂപ ഇടിഞ്ഞ് 5570 രൂപയിലെത്തി. പവന് 44,560 രൂപയാണ് വില, 120 രൂപയുടെ ഇടിവ്. എന്നാല്‍ 24 കാരറ്റ് സ്വര്‍ണത്തിന്‍റെ വിലയില്‍ നേരിയ വര്‍ധനയാണ് ഇന്ന് ഉണ്ടായിട്ടുള്ളത്. 24 കാരറ്റ് സ്വര്‍ണം ഗ്രാമിന് 1 രൂപ വര്‍ധിച്ച് 6,094 രൂപയിലെത്തി. 24 കാരറ്റ് സ്വര്‍ണം പവന്‍റെ വില 48,752 ആണ്, 8 രൂപയുടെ വര്‍ധന.

ഏപ്രിലിലും മേയ് തുടക്കത്തിലും സ്വര്‍ണവിലയില്‍ വലിയ വര്‍ധന പ്രകടമായിരുന്നു. എന്നാല്‍ അമേരിക്കയിലെ ബാങ്കിംഗ് പ്രതിസന്ധി സംബന്ധിച്ച നിക്ഷേപകരുടെ ആശങ്കകള്‍ മയപ്പെട്ടതും ഫെഡ് റിസര്‍വ് ധനനയ അവലോകന യോഗത്തിനു ശേഷമുള്ള പ്രഖ്യാപനങ്ങളും വിലയില്‍ ചാഞ്ചാട്ടത്തിന് ഇടയാക്കി. ഡോളര്‍ ശക്തിപ്പെടുന്നതിന് ഫെഡ് റിസര്‍വ് കൂടുതല്‍ കരുത്തുറ്റ നടപടികളിലേക്ക് നീങ്ങുമെന്ന പ്രതീക്ഷയാണ് ഇപ്പോഴുള്ളത്. എങ്കിലും സ്വർണ വില ഹ്രസ്വകാലയളവില്‍ ഈയൊരു പരിധിയില്‍ തന്നെ തുടരുന്നതിനുള്ള സാധ്യതകളാണ് ഇപ്പോഴുള്ളത്

ഡോളറിനെതിരേ ഇന്ന് രൂപയുടെ മൂല്യം നേരിയ തോതില്‍ ഉയര്‍ന്നു, 1 ഡോളറിന് 82.44 എന്ന നിലയിലാണ് ഇന്നത്തെ വിനിമയം.

വെള്ളി വിലയിലും സ്വര്‍ണ വിലയ്ക്ക് സമാനമായ പ്രവണതയാണ് ഈ മാസം മിക്ക ദിവസങ്ങളിലും പ്രകടമായിട്ടുള്ളത്. ഇന്ന് വെള്ളി വിലയില്‍ വര്‍ധനയാണ് ഉണ്ടായത് ഒരു ഗ്രാമിന് 80 പൈസ വര്‍ധിച്ച് 77.60 രൂപയിലെത്തി. 8 ഗ്രാം വെള്ളിയുടെ വില 620.80 രൂപയാണ്, ഇന്നലത്തെ വിലയില്‍ നിന്ന് 6.40 രൂപയുടെ വര്‍ധന.