സ്വര്‍ണം മാസത്തിലെ ഏറ്റവും ഉയര്‍ന്ന നിലയില്‍

സംസ്ഥാനത്തെ സ്വര്‍ണ വില ഇന്നും ഉയര്‍ന്നു. ഇന്ന് 22 കാരറ്റ് സ്വര്‍ണം ഗ്രാമിന്‍റെ വില 30 രൂപയുടെ വര്‍ധനയോടെ 5365 രൂപയിലെത്തി, പവന് 240 രൂപയുടെ വര്‍ധനയോടെ 42,920 രൂപ. ഈ മാസത്തിലെ ഏറ്റവും ഉയര്‍ന്ന നിലയിലാണ് ഇപ്പോള്‍ സ്വര്‍ണം ഉള്ളത്. പത്തു ദിവസത്തെ താഴോട്ടിറക്കത്തിനു ശേഷം വെള്ളിയാഴ്ച മുതലാണ് വില ഉയര്‍ന്നു തുടങ്ങിയത്.

5 ദിവസങ്ങളിലായി 1000 രൂപയുടെ വര്‍ധനയാണ് 22 കാരറ്റ് പവന് ഉണ്ടായിട്ടുള്ളത്. ഇതിനു മുമ്പുള്ള 10 ദിവസങ്ങളിലായി പവന് 2040 രൂപയുടെ ഇടിവാണ് ഉണ്ടായിരുന്നത്. ഇന്ന് 24 കാരറ്റ് സ്വര്‍ണം ഗ്രാമിന് 33 രൂപയുടെ വര്‍ധനയോടെ 5853 രൂപയാണ് വില, പവന്‍ 264 രൂപയുടെ വര്‍ധനയോടെ 46,824 രൂപയിലെത്തി.

ആഗോള തലത്തിലും സ്വര്‍ണ വില ഉയരുകയാണ്. ഇസ്രയേല്‍- പലസ്തീന്‍ യുദ്ധ സാഹചര്യം കണക്കിലെടുത്ത് സുരക്ഷിത നിക്ഷേപമെന്ന നിലയില്‍ കൂടുതല്‍ പേര്‍ സ്വര്‍ണ നിക്ഷേപത്തിലേക്ക് വരുന്നുണ്ട്. ആഗോള തലത്തില്‍ ഔണ്‍സിന് 1,860-1866 ഡോളര്‍ എന്ന തലത്തിലാണ് സ്വര്‍ണം വിനിമയം നടക്കുന്നത്. ജൂലൈയിലും ഓഗസ്റ്റിലും സെപ്റ്റംബര്‍ ആദ്യ പകുതിയിലും പൊതുവേ ചാഞ്ചാട്ടമാണ് വിലയില്‍ കണ്ടത്. എന്നാല്‍ സെപ്റ്റംബര്‍ അവസാന ദിനങ്ങള്‍ മുതല്‍ തുടര്‍ച്ചയായ ഇടിവ് പ്രകടമാകുകയായിരുന്നു.

സംസ്ഥാനത്തെ വെള്ളി വിലയില്‍ ഇന്ന് മാറ്റമില്ല. ഒരു ഗ്രാം വെള്ളിയുടെ വില 75.5 രൂപയാണ്. എട്ട് ഗ്രാം വെള്ളിക്ക് 604 രൂപയാണ് വില. ഒരു ഡോളറിന് 83.22 രൂപ എന്ന നിലയിലാണ് ഇന്ന് കറന്‍സി വിനിമയം പുരോഗമിക്കുന്നത്.