ഇന്നലത്തെ വില തുടർന്ന് സ്വർണം

സംസ്ഥാനത്തെ സ്വര്‍ണ വിലയില്‍ ഇന്ന് മാറ്റമില്ല. 22 കാരറ്റ് സ്വര്‍ണം ഗ്രാമിന്‍റെ വില 5400 രൂപയാണ്, പവന് 43,200 രൂപ. ഈ മാസത്തിലെ ഏറ്റവും ഉയര്‍ന്ന നിലയിലാണ് ഇപ്പോള്‍ സ്വര്‍ണം ഉള്ളത്. പത്തു ദിവസത്തെ താഴോട്ടിറക്കത്തിനു ശേഷം കഴിഞ്ഞ വെള്ളിയാഴ്ച മുതല്‍ വില വര്‍ധിച്ചു ഉയരുകയായിരുന്നു. കഴിഞ്ഞ 7 ദിവസങ്ങളിലായി 1280 രൂപയുടെ വര്‍ധനയാണ് 22 കാരറ്റ് പവന് ഉണ്ടായിട്ടുള്ളത്. അതിനു മുമ്പുള്ള 10 ദിവസങ്ങളിലായി പവന് 2040 രൂപയുടെ ഇടിവാണ് ഉണ്ടായിരുന്നത്.

ഇന്ന് 24 കാരറ്റ് സ്വര്‍ണം ഗ്രാമിന്‍റെ വിലയിലും ഇന്ന് മാറ്റമുണ്ടായിട്ടില്ല. 5891 രൂപയാണ് ഇന്നത്തെ വില. പവന് 47,128 രൂപ. യുഎസിലെ സെപ്റ്റംബര്‍ പണപ്പെരുപ്പം പ്രതീക്ഷിച്ചിരുന്നതിനും ഉയര്‍ന്ന നിലയിലായതിനാല്‍ ഉയര്‍ന്ന പലിശ നിരക്കുകള്‍ ദീര്‍കാലം നിലനില്‍ക്കുമെന്ന ആശങ്ക വര്‍ധിച്ചിട്ടുണ്ട്. ഇത് യുഎസ് ട്രഷറി ആദായത്തെ ഉയര്‍ത്തിയത് സ്വര്‍ണത്തിന് തിരിച്ചടിയായിട്ടുണ്ട്. 

ആഗോള തലത്തില്‍ ഔണ്‍സിന് 1,868-1878 ഡോളര്‍ എന്ന തലത്തിലാണ് സ്വര്‍ണം വിനിമയം നടക്കുന്നത്. ജൂലൈയിലും ഓഗസ്റ്റിലും സെപ്റ്റംബര്‍ ആദ്യ പകുതിയിലും പൊതുവേ ചാഞ്ചാട്ടമാണ് സ്വര്‍ണ വിലയില്‍ കണ്ടത്. എന്നാല്‍ സെപ്റ്റംബര്‍ അവസാന ദിനങ്ങള്‍ മുതല്‍ തുടര്‍ച്ചയായ ഇടിവ് പ്രകടമാകുകയായിരുന്നു. ഇത് ഒക്റ്റോബറിന്‍റെ ആദ്യ ദിനങ്ങളിലും തുടര്‍ന്നു.

സംസ്ഥാനത്തെ വെള്ളി വിലയില്‍ ഇന്ന് ഇടിവ് പ്രകടമായി. ഒരു ഗ്രാം വെള്ളിയുടെ വില 50 പൈസയുടെ ഇടിവോടെ 75 രൂപയാണ്. എട്ട് ഗ്രാം വെള്ളിക്ക് 600 രൂപയാണ് വില. ഇന്ന് ഡോളറിനെതിരേ രൂപയുടെ മൂല്യം ഇടിഞ്ഞു. ഒരു ഡോളറിന് 83.23 രൂപ എന്ന നിലയിലാണ് ഇന്ന് കറന്‍സി വിനിമയം പുരോഗമിക്കുന്നത്.