തന്ത്രപരമായ പങ്കാളിത്തം; ഇന്ത്യ യുഎസിന് നിര്ണായകം
സ്റ്റേറ്റ് സെക്രട്ടറി മാര്ക്കോ റൂബിയോ- ജയ്ശങ്കര് കൂടിക്കാഴ്ചക്കുശേഷമാണ് യുഎസ് പ്രതികരണം
ഇന്ത്യ യുഎസിന് നിര്ണായകമെന്ന് യുഎസ് സ്റ്റേറ്റ് സെക്രട്ടറി മാര്ക്കോ റൂബിയോ. വിദേശകാര്യ മന്ത്രി എസ് ജയശങ്കറുമായി നടന്ന കൂടിക്കാഴ്ചക്കുശേഷമാണ് യുഎസിന്റെ പ്രതികരണം. നേരത്തെ ഡൊണാള്ഡ് ട്രംപ് പുതിയ എച്ച്-1ബി വിസകള്ക്ക് ഫീസ് വര്ധിപ്പിച്ചത് ഇരു രാജ്യങ്ങളും തമ്മിലുള്ള ബന്ധത്തെ സാരമായി ബാധിച്ചിരുന്നു. ഈ നീക്കം ഇന്ത്യന് ടെക് മേഖലയെ പിടിച്ചുലയ്ക്കുകയും ചെയ്തു.
ഐക്യരാഷ്ട്രസഭയുടെ പൊതുസഭയോടനുബന്ധിച്ചാണ് ജയ്ശങ്കറും റൂബിയോയും കൂടിക്കാഴ്ച നടത്തിയത്.ഇന്ത്യന് ഉല്പ്പന്നങ്ങള്ക്ക് യുഎസ് തീരുവ ചുമത്തിയത് വ്യാപാര സംഘര്ഷങ്ങള്ക്ക് വീണ്ടും തിരികൊളുത്തിയതിനുശേഷം നടന്ന ആദ്യത്തെ മുഖാമുഖ കൂടിക്കാഴ്ചയായിരുന്നു ഇതെന്ന പ്രത്യേകതയും ഉണ്ട്.
വര്ദ്ധിച്ചുവരുന്ന സാമ്പത്തിക അസ്വസ്ഥതകള്ക്കിടയിലും തുടര്ച്ചയുടെ സന്ദേശം ഉയര്ത്തിക്കാട്ടാന് ഇരു രാജ്യങ്ങളും തയ്യാറാകുന്നുണ്ട്.
ഇന്ത്യ അമേരിക്കയ്ക്ക് നിര്ണായക പ്രാധാന്യമുള്ള ഒരു ബന്ധമാണ്,' റൂബിയോ പറഞ്ഞുവെന്ന് സ്റ്റേറ്റ് ഡിപ്പാര്ട്ട്മെന്റ് പത്രക്കുറിപ്പില് പറയുന്നു. വ്യാപാരം, പ്രതിരോധം, ഊര്ജ്ജം, ഫാര്മസ്യൂട്ടിക്കല്സ്, നിര്ണായക ധാതുക്കള് എന്നിവയില് ന്യൂഡല്ഹിയുടെ ഇടപെടലിനെ അദ്ദേഹം പ്രശംസിച്ചു. കൂടാതെ 'ക്വാഡ് വഴി ഉള്പ്പെടെ സ്വതന്ത്രവും തുറന്നതുമായ ഒരു ഇന്തോ-പസഫിക് മേഖലയെ പ്രോത്സാഹിപ്പിക്കുന്നതിന് ഒരുമിച്ച് പ്രവര്ത്തിക്കുന്നത് തുടരുമെന്ന്' അദ്ദേഹം പ്രതിജ്ഞയെടുത്തു.
''ഞങ്ങളുടെ സംഭാഷണം നിലവിലെ ആശങ്കയുള്ള നിരവധി ഉഭയകക്ഷി, അന്താരാഷ്ട്ര വിഷയങ്ങള് ഉള്ക്കൊണ്ടിരുന്നു'', വിദേശകാര്യമന്ത്രി യോഗത്തിനുശേഷം എക്സില് പോസ്റ്റ് ചെയ്തു.
ട്രംപിന്റെ പെട്ടെന്നുള്ള വിസ പ്രഖ്യാപനം ഈ കൂടിക്കാഴ്ചയെ വലിയ തോതില് സ്വാധീനിച്ചു. എച്ച് -1 ബി വിസകളുടെ ഏറ്റവും വലിയ ഉപയോക്താവ് ഇന്ത്യയാണ്. കഴിഞ്ഞ വര്ഷം 71 ശതമാനം അംഗീകാരങ്ങള് ഇന്ത്യ നേടി. അതേസമയം ചൈനക്ക് ലഭിച്ചത് 12ശതമാനം മാത്രമായിരുന്നു.
പുതിയ ഫീസ് ഈ പ്രോഗ്രാമിനെ വളരെയധികം ആശ്രയിക്കുന്ന ഇന്ത്യന് ഐടി സേവന ദാതാക്കളുടെ ചെലവ് കുത്തനെ വര്ദ്ധിപ്പിക്കുമെന്ന് വിശകലന വിദഗ്ധര് പറയുന്നു.
പുകയുന്ന വ്യാപാര തര്ക്കങ്ങള്ക്കൊടുവിലാണ് ഈ ഏറ്റവും പുതിയ തിരിച്ചടി. ജൂലൈയില്, യുഎസ് ഇന്ത്യന് ഉല്പ്പന്നങ്ങള്ക്ക് 25 ശതമാനം തീരുവ ഏര്പ്പെടുത്തിയിരുന്നു, പിന്നീട് ഒരാഴ്ചയ്ക്ക് ശേഷം 25 ശതമാനം കൂടി കൂട്ടി ഇരട്ടിയാക്കി. താരിഫുകള് സംബന്ധിച്ച് ഇരുപക്ഷവും ചര്ച്ചകള് പുനരാരംഭിച്ചിട്ടുണ്ട്.
തിരിച്ചടികള്ക്കിടയിലും വാഷിംഗ്ടണും ന്യൂഡല്ഹിയും നയതന്ത്ര ബന്ധം നിലനിര്ത്തിയിട്ടുണ്ട്. ജൂലൈയില് ജപ്പാനുമായും ഓസ്ട്രേലിയയുമായും നടന്ന ക്വാഡ് വിദേശകാര്യ മന്ത്രിമാരുടെ യോഗത്തിലാണ് റൂബിയോയും ജയ്ശങ്കറും അവസാനമായി കണ്ടുമുട്ടിയത്.