അല്ലു അര്ജുന്-സുകുമാര് ചിത്രം പുഷ്പ 2 ഇന്ത്യന് സിനിമയിലെ സമീപകാലത്തെ ഏറ്റവും വലിയ ആദ്യ ദിന കളക്ഷന് സ്വന്തമാക്കിയാതായി റിപ്പോര്ട്ട്. ഇന്ത്യന് ബോക്സോഫീസില് നിന്ന് മാത്രം 175.1 കോടി നേടിയെന്നു ഇന്ത്യാ ടുഡേ റിപ്പോര്ട്ട് ചെയ്തു.
ആദ്യ രണ്ടു ദിവസത്തിനുള്ള ഏറ്റവും കൂടുതല് പണം വാരിയ ചിത്രം എന്ന റെക്കോഡാണ് പുഷ്പ 2 സ്വന്തമാക്കിയിരിക്കുന്നത്. കൂടാതെ വരുമാനത്തില് ഹിന്ദി പതിപ്പ് തെലുങ്ക് പതിപ്പിനെ മറികടന്നു.ബോക്സ് ഓഫീസില് രണ്ടാംദിനം പിന്നിടുമ്പോള് 417 കോടിയാണ് ചിത്രം വരുമാനം നേടിയത്.
പുഷ്പ ആദ്യഭാഗം ആഗോളതലത്തിൽ 350 കോടിയോളം രൂപയായിരുന്നു നേടിയിരുന്നത്. ഈ തുകയാണ് രണ്ട് ദിവസം കൊണ്ട് പുഷ്പ 2 മറികടന്നിരിക്കുന്നത്. ഈ ട്രെൻഡ് തുടർന്നാൽ സിനിമയുടെ ടോട്ടൽ കളക്ഷൻ 1000 കോടി കടക്കുമെന്നാണ് അനലിസ്റ്റുകളുടെ നിഗമനം.
കേരളത്തിലും സിനിമ മികച്ച കളക്ഷൻ ആണ് നേടിയിരിക്കുന്നത്. ചിത്രം ആദ്യദിനത്തിൽ കേരളത്തിൽ നിന്ന് 6.35 കോടി നേടിയെന്നാണ് റിപ്പോർട്ടുകൾ സൂചിപ്പിക്കുന്നത്. ഒരു തെലുങ്ക് ഡബ്ബ് സിനിമ കേരളത്തിൽ നിന്നും നേടുന്ന ഏറ്റവും ഉയർന്ന കളക്ഷനാണിത്. രാജമൗലി ചിത്രമായ ബാഹുബലി 2 നേടിയ 5.45 കോടി എന്ന റെക്കോർഡാണ് പുഷ്പ 2 മറികടന്നത്.
ലോകമെമ്പാടുമുള്ള 12,500 ൽ അധികം സ്ക്രീനുകളിൽ ആണ് പുഷ്പ 2 ഇറങ്ങിയിരിക്കുന്നത്. പ്രീ സെയിലിൽ നിന്ന് മാത്രം ചിത്രം 100 കോടി നേടിയിരുന്നു. തെലുങ്ക്, തമിഴ്, മലയാളം, ഹിന്ദി, കന്നഡ, ബംഗാളി ഭാഷകളിലാണ് ചിത്രം പ്രദർശനത്തിനെത്തിയത്. ഇ ഫോർ എന്റർടെയ്ൻമെന്റ്സാണ് പുഷ്പ 2 കേരളത്തിലെത്തിക്കുന്നത്.