ഗാസ ഏറ്റെടുത്ത് വികസിപ്പിക്കുമെന്ന് ട്രംപ്; നടക്കാത്ത പദ്ധതിയെന്ന് ഹമാസ്

യുദ്ധത്തില്‍ തകര്‍ന്ന ഗാസ മുനമ്പ് യുഎസ് ഏറ്റെടുക്കുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. പാലസ്തീനിലുള്ളവരെ മറ്റൊരിടത്ത് പുനരധിവസിപ്പിച്ചശേഷം അവിടം സാമ്പത്തികമായി വികസിപ്പിക്കുമെന്നും അദ്ദേഹം പ്രഖ്യാപിച്ചു.

യുഎസ് സന്ദര്‍ശനം നടത്തുന്ന ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവിനൊപ്പം നടത്തിയ സംയുക്ത പത്രസമ്മേളനത്തിലാണ് ട്രംപ് തന്റെ സര്‍പ്രൈസ് പ്ലാന്‍ പ്രഖ്യാപിച്ചത്. എന്നാല്‍ ട്രംപിന്റെ പ്രഖ്യാപനം ഇപ്പോള്‍ നടന്നുവരുന്ന ഇസ്രയേല്‍- ഹമാസ് സമാധാന ചര്‍ച്ചകളെ പ്രതികൂലമായി ബാധിച്ചേക്കും.

''ആവശ്യമെങ്കില്‍ ഞങ്ങള്‍ അത് ചെയ്യും, ഞങ്ങള്‍ ആ ഭാഗം ഏറ്റെടുക്കാന്‍ പോകുകയാണ്, ഞങ്ങള്‍ അത് വികസിപ്പിക്കുകയും ആയിരക്കണക്കിന് ആയിരക്കണക്കിന് തൊഴിലവസരങ്ങള്‍ സൃഷ്ടിക്കുകയും ചെയ്യും, ഇത് മുഴുവന്‍ മിഡില്‍ ഈസ്റ്റിനും അഭിമാനിക്കാവുന്ന ഒന്നായിരിക്കും,'' ട്രംപ് കൂട്ടിച്ചേര്‍ത്തു.

അവിടെ ആരാണ് താമസിക്കുകയെന്ന ചോദ്യത്തിന്, അത് 'ലോകത്തിലെ ജനങ്ങളുടെ' ഒരു ഭവനമായി മാറുമെന്ന് ട്രംപ് പറഞ്ഞു.

എന്നാല്‍ എങ്ങനെയാണ്, എന്ത് അധികാരത്തിന്‍ കീഴിലാണ് യുഎസിന് ഗാസയുടെ ഭൂമി ഏറ്റെടുക്കാനും ദീര്‍ഘകാലത്തേക്ക് അത് കൈവശപ്പെടുത്താനും കഴിയുക എന്ന ചോദ്യത്തോട് ട്രംപ് നേരിട്ട് പ്രതികരിച്ചില്ല.

പ്രാദേശിക നേതാക്കളുമായി താന്‍ സംസാരിച്ചതായും അവര്‍ ഈ ആശയത്തെ പിന്തുണച്ചതായും അദ്ദേഹം പറഞ്ഞു. ''കുറെ മാസങ്ങളായി ഞാന്‍ ഇത് വളരെ സൂക്ഷ്മമായി പഠിച്ചു,'' ട്രംപ് കൂട്ടിച്ചേര്‍ത്തു, താന്‍ ഗാസ സന്ദര്‍ശിക്കുമെന്നും യുഎസ് പ്രസിഡന്റ് വെളിപ്പെടുത്തി. എന്നാല്‍ എപ്പോഴായിരിക്കുമെന്ന് അദ്ദേഹം വ്യക്തമാക്കിയില്ല.

അറബ് നേതാക്കള്‍ പാലസ്തീനികളെ 'ശാശ്വതമായി' പുനരധിവസിപ്പിക്കുന്നതിനെ പിന്തുണയ്ക്കുമെന്ന് ട്രംപ് പറഞ്ഞു.

അതേസമയം ഗാസയിലെ ജനസംഖ്യയെ നിര്‍ബന്ധിതമായി മാറ്റിപ്പാര്‍പ്പിക്കുന്നത് അന്താരാഷ്ട്ര നിയമത്തിന്റെ ലംഘനമായിരിക്കും, അത് മേഖലയില്‍ മാത്രമല്ല, വാഷിംഗ്ടണിന്റെ പാശ്ചാത്യ സഖ്യകക്ഷികളും ശക്തമായി എതിര്‍ക്കും. ചില മനുഷ്യാവകാശ വക്താക്കള്‍ ഈ ആശയത്തെ വംശീയ ഉന്മൂലനത്തോട് ഉപമിക്കുന്നു.

ഹമാസിന്റെ മുതിര്‍ന്ന നേതാവ് സമി അബു സുഹ്രി, ഗസ്സക്കാരെ വിട്ടുപോകാനുള്ള ട്രംപിന്റെ ആഹ്വാനത്തെ 'അവരുടെ ഭൂമിയില്‍ നിന്ന് പുറത്താക്കല്‍' എന്ന് അപലപിച്ചു.