യു പി എസ് എസി പരീക്ഷകള്ക്ക് ഇനി ആധാര് വെരിഫിക്കേഷന്
- ആധാര് വെരിഫിക്കേഷന് സംബന്ധിച്ച വിജ്ഞാപനം പേഴ്സണല് മന്ത്രാലയം പുറത്തിറക്കി
- പൂജ ഖേദ്കറിനെതിരെ യുപിഎസ് സി അടുത്തിടെ സ്വീകരിച്ച നടപടികളുടെ പശ്ചാത്തലത്തിലാണ് പുതിയ നീക്കം
- യു പി എസ് സി പ്രതിവര്ഷം 14 പ്രധാന പരീക്ഷകളാണ് നടത്തുന്നത്
ഉദ്യോഗാര്ത്ഥികളുടെ ഐഡന്റിറ്റികള് സ്വമേധയാ പരിശോധിക്കുന്നതിന് ആധാര് അടിസ്ഥാനമാക്കിയുള്ള പ്രാമാണീകരണം (ഒഥന്റിക്കേഷന്) നടപ്പിലാക്കാന് യൂണിയന് പബ്ലിക് സര്വീസ് കമ്മീഷനെ കേന്ദ്രം അനുവദിച്ചു. രജിസ്ട്രേഷന് സമയത്തും പരീക്ഷകളുടെയും റിക്രൂട്ട്മെന്റിന്റെയും വിവിധ ഘട്ടങ്ങളിലും ഈ പുതിയ നടപടി ബാധകമായിരിക്കും. ഇത് സംബന്ധിച്ച വിജ്ഞാപനം പേഴ്സണല് മന്ത്രാലയം പുറത്തിറക്കി. പരീക്ഷാ പ്രക്രിയയുടെ സമഗ്രത വര്ധിപ്പിക്കാന് ലക്ഷ്യമിട്ടുള്ളതാണ് നടപടി.
യുപിഎസ്സിക്ക് അതിന്റെ 'വണ് ടൈം രജിസ്ട്രേഷന്' പോര്ട്ടലിലും റിക്രൂട്ട്മെന്റ് പ്രക്രിയയിലുടനീളം ഐഡന്റിറ്റി വെരിഫിക്കേഷനായി ആധാറിന്റെ അല്ലെങ്കില് ഇ-കെവൈസി പ്രാമാണീകരണ സൗകര്യങ്ങള് ഉപയോഗിക്കാന് കഴിയും.
ആധാര് സംവിധാനം നിയന്ത്രിക്കുന്ന യുണീക്ക് ഐഡന്റിഫിക്കേഷന് അതോറിറ്റി ഓഫ് ഇന്ത്യ (യുഐഡിഎഐ) പുറപ്പെടുവിച്ച നിയമത്തിന്റെയും ചട്ടങ്ങളുടെയും നിര്ദ്ദേശങ്ങളുടെയും പ്രസക്തമായ എല്ലാ വ്യവസ്ഥകളും യുപിഎസ് സി ഇനി പാലിക്കേണ്ടതുണ്ട്.
പ്രൊബേഷണറി ഐഎഎസ് ഓഫീസര് പൂജ ഖേദ്കറിനെതിരെ യുപിഎസ്സി അടുത്തിടെ സ്വീകരിച്ച നടപടികളുടെ പശ്ചാത്തലത്തിലാണ് പുതിയ സംഭവവികാസങ്ങള്. തന്റെ ഐഡന്റിറ്റി കൃത്രിമം കാണിച്ചതിനും മറ്റ് പിന്നാക്ക വിഭാഗങ്ങള് (ഒബിസി) നോണ് ക്രീമി ലെയര് വിഭാഗം പോലുള്ള ക്വാട്ടകള് ദുരുപയോഗം ചെയ്തതിനും ആരോപിക്കപ്പെട്ട ഖേദ്കറെ, ഭാവിയിലെ എല്ലാ യുപിഎസ്സി പരീക്ഷകളില് നിന്നും റിക്രൂട്ട്മെന്റ് പ്രക്രിയകളില് നിന്നും സ്ഥിരമായി വിലക്കിയിരുന്നു.
ആധാര് അടിസ്ഥാനമാക്കിയുള്ള പ്രാമാണീകരണം സ്വീകരിക്കാനുള്ള യുപിഎസ്സിയുടെ തീരുമാനം, തിരിച്ചറിയല് തട്ടിപ്പ് തടയാനും യോഗ്യരായ ഉദ്യോഗാര്ത്ഥികള് മാത്രമേ അതിന്റെ പരീക്ഷകളില് പങ്കെടുക്കുന്നുള്ളൂ എന്ന് ഉറപ്പാക്കാനും ലക്ഷ്യമിട്ടുള്ളതാണ്.
സിവില് സര്വീസ് പരീക്ഷയും ഗ്രൂപ്പിലെ വിവിധ റിക്രൂട്ട്മെന്റ് ടെസ്റ്റുകളും ഉള്പ്പെടെ യു പി എസ് സി പ്രതിവര്ഷം 14 പ്രധാന പരീക്ഷകള് നടത്തുന്നു. ഇവയുടെ സമഗ്രത ഉറപ്പു വരുത്തേണ്ടതുണ്ട്.
വഞ്ചനയും ആള്മാറാട്ടവും ചെറുക്കുന്നതിന് ഫേഷ്യല് റെക്കഗ്നിഷനും ആര്ട്ടിഫിഷ്യല് ഇന്റലിജന്സ് അടിസ്ഥാനമാക്കിയുള്ള സിസിടിവി നിരീക്ഷണ സംവിധാനവും അവതരിപ്പിക്കാനുള്ള പദ്ധതികള് ജൂണില് കമ്മീഷന് പ്രഖ്യാപിച്ചിരുന്നു. ആധാര് അടിസ്ഥാനമാക്കിയുള്ള ഫിംഗര്പ്രിന്റ് പ്രാമാണീകരണവും ഉദ്യോഗാര്ത്ഥികളുടെ മുഖം തിരിച്ചറിയലും, പരീക്ഷാ സമയത്ത് തത്സമയ എഐ അടിസ്ഥാനമാക്കിയുള്ള സിസിടിവി നിരീക്ഷണവും അടിസ്ഥാനമാക്കി കമ്മീഷന് ബിഡ് ക്ഷണിച്ചിരുന്നു.