മാലദ്വീപുമായുള്ള കച്ചവടം നിര്ത്തിവെക്കാന് സിഎഐടി
- മാലദ്വീപ് മന്ത്രിമാരുടെ അപകീര്ത്തിപരമായ പരാമര്ശങ്ങളില് പ്രതിഷേധിച്ചാണ് ആഹ്വാനം
- മന്ത്രിമാരുടെ പരമാര്ശങ്ങള് ഇന്ത്യയില് വിവാദം ഉണ്ടാക്കിയിട്ടുണ്ട്
ഇന്ത്യ-മാലദ്വീപ് നയതന്ത്ര തര്ക്കങ്ങള്ക്കിടയില്, ദ്വീപ് രാഷ്ട്രവുമായി വ്യാപാര ഇടപാടുകള് നടത്തുന്നതില് നിന്ന് വിട്ടുനില്ക്കാന് വ്യാപാരികളുടെ സംഘടനയായ സിഎഐടി ആഭ്യന്തര വ്യാപാരികളോടും കയറ്റുമതിക്കാരോടും ആവശ്യപ്പെട്ടു.
പ്രധാനമന്ത്രി നരേന്ദ്ര മോദിയെ ലക്ഷ്യം വച്ചുള്ള അപകീര്ത്തികരമായ പരാമര്ശങ്ങള് ബിസിനസ് സമൂഹത്തിന് സ്വീകാര്യമല്ലെന്ന് സിഎഐടി സെക്രട്ടറി ജനറല് പ്രവീണ് ഖണ്ഡേല്വാള് പറഞ്ഞു. അത്തരം അനാദരവുള്ള പെരുമാറ്റത്തിനെതിരെ ഐക്യദാര്ഢ്യം പ്രകടിപ്പിക്കാനും വിസമ്മതം രേഖപ്പെടുത്താനുമാണ് ഈ ബഹിഷ്കരണ ആഹ്വാനം ലക്ഷ്യമിടുന്നത്.
കോണ്ഫെഡറേഷന് ഓഫ് ഓള് ഇന്ത്യ ട്രേഡേഴ്സ് (സിഎഐടി) 'വ്യാപാരികളോടും കയറ്റുമതിക്കാരോടും മാലദ്വീപുമായി വ്യാപാര ഇടപാടുകള് നടത്തുന്നതില് നിന്ന് വിട്ടുനില്ക്കാന് അഭ്യര്ത്ഥിച്ചതായി' പ്രസ്താവിച്ചു.
മാലദ്വീപുമായുള്ള വ്യാപാര ഇടപെടലുകളില് നിന്ന് താല്ക്കാലികമായി വിട്ടുനില്ക്കുന്നതിലൂടെ ഇത്തരം പെരുമാറ്റത്തിനെതിരെ ശക്തമായ സന്ദേശം അയയ്ക്കുന്നതില് ബിസിനസ് സമൂഹം ഒറ്റക്കെട്ടാണെന്ന് ബോധ്യപ്പെടുത്തുകകൂടിയാണ് ചെയ്യുന്നതെന്ന് ഖണ്ഡേല്വാള് പറഞ്ഞു.
അതിനിടെ, ഇന്ത്യയിലെ മാലദ്വീപ് പ്രതിനിധിയെ തിങ്കളാഴ്ച വിദേശകാര്യ മന്ത്രാലയത്തിലേക്ക് വിളിപ്പിച്ചതായും ദ്വീപിലെ നിരവധി മന്ത്രിമാര് മോദിക്കെതിരെ സോഷ്യല് മീഡിയയില് പോസ്റ്റ് ചെയ്ത പരാമര്ശങ്ങളില് കടുത്ത ആശങ്ക അറിയിച്ചതായും വൃത്തങ്ങള് അറിയിച്ചു.
മോദിക്കെതിരെ സോഷ്യല് മീഡിയയില് അപകീര്ത്തികരമായ പോസ്റ്റുകള് ഇട്ടതിന് മൂന്ന് ഉപമന്ത്രിമാരെ മാലദ്വീപ് സര്ക്കാര് ഞായറാഴ്ച സസ്പെന്ഡ് ചെയ്തിരുന്നു.
പ്രധാനമന്ത്രിയുടെ ലക്ഷദ്വീപ് സന്ദര്ശനത്തെ തുടര്ന്നുള്ള എക്സില് അദ്ദേഹത്തിന്റെ പോസ്റ്റിനെ മാലദ്വീപിലെ മൂന്ന് ഉപമന്ത്രിമാര് വിമര്ശിച്ചിരുന്നു. ഇത് കേന്ദ്രഭരണ പ്രദേശത്തെ മാലിദ്വീപിന് ബദല് ടൂറിസ്റ്റ് കേന്ദ്രമായി അവതരിപ്പിക്കാനുള്ള ശ്രമമാണെന്ന് അവര് പറഞ്ഞു. മോശം പ്രതികരണം നടത്തിയ യുവജന മന്ത്രാലയത്തിലെ ഡെപ്യൂട്ടി മന്ത്രിമാരായ മല്ഷ ഷെരീഫ്, മറിയം ഷിയുന, അബ്ദുള്ള മഹ്സൂം മജിദ് എന്നിവരെ അവരുടെ സ്ഥാനങ്ങളില് നിന്ന് സസ്പെന്ഡ് ചെയ്തതായി മാലദ്വീപ് പിന്നീട് അറിയിച്ചു.
മന്ത്രിമാരുടെ അവഹേളനപരമായ പരാമര്ശങ്ങള് ഇന്ത്യയില് വിവാദമുണ്ടാക്കിയിട്ടുണ്ട്, മാലിദ്വീപിലേക്ക് പോകുന്നതിനുപകരം ആഭ്യന്തര വിനോദസഞ്ചാര കേന്ദ്രങ്ങള് പര്യവേക്ഷണം ചെയ്യാന് എക്സില് നിരവധി സെലിബ്രിറ്റികള് ആളുകളെ പ്രേരിപ്പിക്കുന്നുമുണ്ട്.