2022-23: സ്വര്‍ണ ഇറക്കുമതിയില്‍ 24% ഇടിവ്

ഇന്ത്യയുടെ സ്വർണ്ണ ഇറക്കുമതി കഴിഞ്ഞ സാമ്പത്തിക വര്‍ഷത്തില്‍ 24.15 ശതമാനം കുറഞ്ഞ് 35 ബില്യൺ ഡോളറായെന്ന് വാണിജ്യ മന്ത്രാലയത്തിന്റെ കണക്കുകൾ വ്യക്തമാക്കുന്നു. 2021-22 ൽ 46.2 ബില്യൺ ഡോളറിന്‍റെ ഇറക്കുമതി നടന്ന സ്ഥാനത്താണിത്. ആഗോള സാമ്പത്തിക അനിശ്ചിതത്വങ്ങളാണ് ഇറക്കുമതിയെ പ്രധാനമായും ബാധിച്ചത്.

2022 ഓഗസ്റ്റ് മുതൽ ഈ വർഷം ഫെബ്രുവരി വരെയുള്ള കാലയളവിൽ ഇറക്കുമതിയിലെ വളർച്ചാ നിരക്ക് നെഗറ്റീവ് ആയിരുന്നു. എന്നാല്‍ മാർച്ചിൽ ഇത് 3.3 ബില്യൺ ഡോളറിന്‍റെ ഇറക്കുമതിയിലേക്ക് കുതിച്ചുയർന്നു, മുൻ വർഷം മാർച്ചില്‍ ഇത് 1 ബില്യൺ ഡോളറായിരുന്നുവെന്നും ഡാറ്റ കാണിക്കുന്നു.

വെള്ളി ഇറക്കുമതിയില്‍ പക്ഷേ കഴിഞ്ഞ സാമ്പത്തിക വർഷത്തിൽ 6.12 ശതമാനം ഉയർച്ചയാണ് പ്രകടമായത്. 5.29 ബില്യൺ ഡോളറിന്‍റെ വെള്ളി ഇറക്കുമതിയാണ് 2022 -23ല്‍ നടന്നത്. 2022-23 കാലയളവിൽ രത്‌നങ്ങളുടെയും ആഭരണങ്ങളുടെയും കയറ്റുമതി 3 ശതമാനം കുറഞ്ഞ് ഏകദേശം 38 ബില്യൺ ഡോളറായി.

സ്വർണ്ണ ഇറക്കുമതിയിലെ ഗണ്യമായ ഇടിവ് രാജ്യത്തിന്റെ വ്യാപാര കമ്മി കുറയ്ക്കുന്നതിന് സഹായിച്ചിട്ടില്ലെന്നാണ് കണക്കുകള്‍ വ്യക്തമാക്കുന്നത്. 2022-23 ലെ വ്യാപാര കമ്മി 267 ബില്യൺ ഡോളറായാണ് കണക്കാക്കുന്നത്. മുൻ വർഷം ഇത് 191 ബില്യൺ ഡോളറായിരുന്നു. വ്യവസായ വിദഗ്ധരുടെ അഭിപ്രായത്തിൽ, സ്വർണ്ണത്തിന്റെ ഉയർന്ന ഇറക്കുമതി തീരുവയും ആഗോള സാമ്പത്തിക അനിശ്ചിതത്വങ്ങളും ഇറക്കുമതി കുറയുന്നതിന് കാരണമായി.

കറണ്ട് അക്കൗണ്ട് കമ്മി കുറയ്ക്കുന്നതിനുള്ള പരിശ്രമങ്ങളുടെ ഭാഗമായി കഴിഞ്ഞ വർഷം കേന്ദ്ര സര്‍ക്കാര്‍ സ്വർണ ഇറക്കുമതി തീരുവ 10.75 ശതമാനത്തിൽ നിന്ന് 15 ശതമാനമായി ഉയർത്തിയിരുന്നു. യുഎസ്എയിലെ പണപ്പെരുപ്പം, ഉയർന്ന പലിശനിരക്ക്, റഷ്യ-ഉക്രെയ്ൻ പ്രതിസന്ധി, ചൈനയില്‍ സമ്പൂർണ്ണ സാമ്പത്തിക പുനരുജ്ജീവനം ഉണ്ടാക്കാത്തത് എന്നിവയെല്ലാം ഈ മേഖലയ്ക്ക് വെല്ലുവിളി സൃഷ്ടിക്കുന്നതായി ജിജെഇപിസി മുൻ ചെയർമാനും കാമ ജ്വല്ലറി മാനേജിംഗ് ഡയറക്ടറുമായ കോളിൻ ഷാ പറഞ്ഞു.