ടാറ്റ കെമിക്കൽസിന് ആശ്വാസം: നിഫ്റ്റി 26,000 നിലനിർത്തിയാൽ വിപണിക്ക് കുതിച്ചേക്കും

ഇന്ത്യൻ ഓഹരി വിപണി ഇന്ന് ഫ്ലാറ്റായി വ്യാപാരം തുടങ്ങാനാണ് സാധ്യത. ആഗോള തലത്തിലുണ്ടായ സമ്മിശ്ര സൂചനകളാണ് ഇതിന് കാരണം. രാവിലെ 7:45-ന്, GIFT നിഫ്റ്റി 10 പോയിൻ്റ് താഴ്ന്നാണ് വ്യാപാരം നടക്കുന്നത്.  ആഗോളതലത്തിൽ കരുതലോടെയുള്ള സമീപനമാണ് നിലനിൽക്കുന്നതെങ്കിലും മികച്ച രണ്ടാം പാദ വരുമാനവുംആഭ്യന്തര സ്ഥാപനങ്ങളുടെ തുടർച്ചയായ നിക്ഷേപവും വിപണിക്ക് ആവേശകരമായ ഒരു ബുൾറൺ നൽകുന്നുണ്ട്.

തിങ്കളാഴ്ചത്തെ വ്യാപാരത്തിൽ  സൂചികകൾ ശക്തമായ തിരിച്ചുവരവ് നടത്തിയിരുന്നു. സെൻസെക്‌സ് 567 പോയിൻ്റ് ഉയർന്ന് 84,778 എന്ന ലെവലിലും നിഫ്റ്റി 50 171 പോയിൻ്റ് ഉയർന്ന് 25,966 എന്ന ലെവലിലും ക്ലോസ് ചെയ്തു. നിഫ്റ്റി ഇടയ്ക്ക് 26,000 എന്ന നില മറികടന്നെങ്കിലും  നേട്ടം കുറഞ്ഞു

ആഗോള വിപണിയിലെ സൂചനകൾ

യു.എസ്. വിപണിയായ വോൾ സ്ട്രീറ്റിലെ റെക്കോർഡ് റാലി രണ്ടാമത്തെ ദിവസവും ചരിത്രത്തിലെ ഉയർന്ന നിലയിൽ ക്ലോസ് ചെയ്തു. യു.എസ്-ചൈന വ്യാപാര കരാറിനെക്കുറിച്ചുള്ള ശുഭാപ്തിവിശ്വാസവും ഫെഡറൽ റിസർവ് വീണ്ടും പലിശ നിരക്ക് കുറയ്ക്കുമെന്ന പ്രതീക്ഷയുമാണ് ഇതിന് കാരണം.

എന്നാൽ, ഏഷ്യൻ വിപണികൾ ഇന്ന് നേരിയ ലാഭമെടുക്കലിനെ തുടർന്ന് താഴ്ന്ന നിലയിൽ വ്യാപാരം നടത്തുകയാണ്. ജപ്പാൻ, ദക്ഷിണ കൊറിയ, ഓസ്‌ട്രേലിയൻ സൂചികകൾ കഴിഞ്ഞ സെഷനിലെ റെക്കോർഡ് ഉയർച്ചയ്ക്ക് ശേഷം നേരിയ തോതിൽ താഴേക്ക് പോയി.

ടെക്നിക്കൽ അനാലിസിസ്

നിഫ്റ്റി ഫ്യൂച്ചേഴ്‌സ് 25,515 എന്ന ലെവലിൽ ക്ലോസ് ചെയ്ത് ഡെയ്‌ലി ചാർട്ടിൽ ഒരു ബുള്ളിഷ് കാൻഡിൽ രൂപീകരിച്ചു. ഇത് വിപണിയിൽ വാങ്ങൽ താൽപ്പര്യം നിലനിൽക്കുന്നതായി സൂചിപ്പിക്കുന്നു. നിഫ്റ്റി പ്രധാനപ്പെട്ട സപ്പോർട്ട് ലെവലിന് മുകളിൽ തുടരുന്നത് പോസിറ്റീവ് ട്രെൻഡ് നിലനിർത്തുന്നു.

 റെസിസ്റ്റൻസ് ലെവൽ: 26,100–26,150,  26,277–26,300.

പ്രധാന സപ്പോർട്ട് ലെവൽ- 25,900, 25,800.

നിഫ്റ്റി 25,900-ന് മുകളിൽ തുടരുന്നിടത്തോളം കാലം ട്രെൻഡ് പോസിറ്റീവ് ആയിരിക്കും.

ബാങ്ക് നിഫ്റ്റി

ബാങ്ക് നിഫ്റ്റി 415 പോയിൻ്റ് ഉയർന്ന് 58,114-ലാണ് ക്ലോസ് ചെയ്തത്. ഇത് ബാങ്കിംഗ് മേഖലയിൽ തുടർച്ചയായ വാങ്ങൽ താൽപ്പര്യം ഉണ്ടെന്ന് വ്യക്തമാക്കുന്നു. സൂചിക  50-ദിവസത്തെയും 200-ദിവസത്തെയും മൂവിംഗ് ആവറേജുകൾക്ക് മുകളിലാണ് ട്രേഡ് ചെയ്യുന്നത്, ഇത് ശക്തമായ ബുള്ളിഷ് മൊമൻ്റം സൂചിപ്പിക്കുന്നു. ആർഎസ്ഐ ഏകദേശം 72-ൽ എത്തിയത് ഓവർബോട്ട് നിലയിലേക്ക് അടുക്കുന്നതിൻ്റെ സൂചന നൽകുന്നു. ഇത് ഹ്രസ്വകാലത്തേക്ക് ഒരു കൺസോളിഡേഷന് (ഒരു നിലയിൽ വ്യാപാരം) സാധ്യത നൽകുന്നു.

ഉടൻ നേരിടാൻ സാധ്യതയുള്ള റെസിസ്റ്റൻസ് 58,216–58,350 ലെവലാണ്. അതിനുശേഷം 58,569, 58,739 എന്ന ലെവലിലെത്തും. 

പ്രധാന സപ്പോർട്ട് ലെവൽ: 57,779, 57,425.

ട്രെൻഡ് മൊത്തത്തിൽ പോസിറ്റീവാണ്.

ശ്രദ്ധിക്കേണ്ട ഓഹരികൾ

ടാറ്റ കെമിക്കൽസിന് വലിയ ആശ്വാസമായി കോടതി വിധി. കെനിയൻ കൗണ്ടി ഗവൺമെൻ്റ് ആവശ്യപ്പെട്ട 783 കോടി രൂപയുടെ നികുതി ബാധ്യത അനിയന്ത്രിതവും നിയമവിരുദ്ധവുമാണെന്ന് നൈറോബിയിലെ കോർട്ട് ഓഫ് അപ്പീൽ വിധിച്ചു. ടാറ്റ കെമിക്കൽസിൻ്റെ ഉപസ്ഥാപനമായ ടാറ്റ കെമിക്കൽസ് മഗാഡിക്ക് (TCML) അനുകൂലമായ  വിധി, കമ്പനിയുടെ ഒരു പ്രധാന ബാധ്യത ഒഴിവാക്കി. ഇത് ഓഹരിക്ക് അനുകൂലമായേക്കും.

ശ്രദ്ധിക്കേണ്ട മറ്റ് ഓഹരികൾ

ഇന്ത്യൻ ഓയിൽ കോർപ്പറേഷൻ  കുറഞ്ഞ ആഗോള അസംസ്‌കൃത എണ്ണവില കാരണം റിഫൈനിംഗ് മാർജിനുകളിൽ ഉണ്ടായ വർധനവ് രണ്ടാം പാദത്തിലെ ലാഭത്തിൽ വലിയ കുതിച്ചുചാട്ടത്തിന് കാരണമായിട്ടുണ്ട്. 

ജെകെ ടയർ ആൻഡ്  ഇൻഡസ്ട്രീസ്: ഉപഭോഗ നികുതി കുറച്ചതിനെത്തുടർന്ന് ഉത്സവ സീസണിലെ ഡിമാൻഡ് മെച്ചപ്പെട്ടതിനാൽ അഞ്ച് പാദത്തിന് ശേഷം ആദ്യമായി ലാഭത്തിൽ വർധനവ് രേഖപ്പെടുത്തി.

റേമണ്ട് ലിമിറ്റഡ്: ഉയർന്ന ചെലവുകൾ വരുമാന വർധനവിനെ മറികടന്നതിനാൽ  ലാഭം കുറഞ്ഞു.

ഐപിഒ. ഏതൊക്കെ?

ടെക്‌സ്‌ഫാബിന്റെ 55 കോടി രൂപയുടെ എസ്എംഇ ഐപിഒഒക്ടോബർ 28-ന് സബ്‌സ്‌ക്രിപ്‌ഷനായി തുറക്കും. ഒരു ഓഹരിയുടെ വില 96–102 രൂപ ആണ്. "ട്രേഡ് യുനോ ഫാബ്രിക്‌സ്", "ഫാൾ ഇൻ ലവ്" എന്നീ ബ്രാൻഡുകളിലൂടെ ശ്രദ്ധേയരായ  കമ്പനി 2025 സാമ്പത്തിക വർഷത്തിൽ 18 ശതമാനം വരുമാന വളർച്ച ലക്ഷ്യമിടുന്നു. 183 ശതമാനമാണ് അറ്റാദായ വളർച്ച.ഇഷ്യൂ ഒക്ടോബർ 30-ന് അവസാനിക്കും.