ടെക് മഹീന്ദ്രയുടെ 'ഇന്ത്യ എഐ' കുതിപ്പ്: താൽക്കാലിക തളർച്ചയിൽ കുലുങ്ങില്ല

ഇന്ത്യൻ ഐടി ലോകത്തെ പ്രമുഖരായ ടെക് മഹീന്ദ്ര 2025 ഒക്ടോബർ 14-ന് പുറത്തുവിട്ട രണ്ട് വാർത്തകൾ നിക്ഷേപകരെയും സാങ്കേതിക വിദഗ്ധരെയും ഒരുപോലെ ആശയക്കുഴപ്പത്തിലാക്കിയിരിക്കുകയാണ്. ഒരുവശത്ത്, ഉയർന്നു വരുന്ന ചിലവുകളും ആഗോള സാമ്പത്തിക അനിശ്ചിതത്വവും കാരണം 2026 സാമ്പത്തിക വ‍ർഷത്തിലെ രണ്ടാം പാദത്തിലെ അറ്റാദായം 4.5 ശതമാനം കുറഞ്ഞ് 1,195 കോടി രൂപയായി.1 മറുവശത്ത്, ഇന്ത്യയുടെ ദേശീയ എഐ മിഷൻ്റെ ഭാഗമായി  സോവറിൻ ലാർജ് ലാംഗ്വേജ് മോഡൽ തദ്ദേശീയമായി നിർമ്മിക്കാനുള്ള വലിയ നീക്കം ടെക്ക് മഹീന്ദ്ര പ്രഖ്യാപിച്ചു. 

പാദഫലം; അടിത്തറയിൽ ഉലച്ചിൽ

കമ്പനിയുടെ വരുമാനത്തിൽ 5.1 ശതമാനം വർധനവ് രേഖപ്പെടുത്തി 13,995 കോടി രൂപ നേടിയെങ്കിലും, അറ്റാദായത്തിലെ ഇടിവ് ആശങ്കയുളവാക്കുന്നു. അമേരിക്കൻ താരിഫുകൾ, വിസ സംബന്ധമായ പ്രശ്നങ്ങൾ തുടങ്ങിയ  ബാഹ്യ ഘടകങ്ങൾ കമ്പനിയുടെ ലാഭക്ഷമതയ്ക്ക് മങ്ങലേൽപ്പിച്ചു.

എന്നാൽ, ബാങ്കിംഗ്, ഫിനാൻഷ്യൽ സർവീസസ് മാനുഫാക്ചറിംഗ് പോലുള്ള പ്രധാന മേഖലകളിൽ നിന്നുള്ള വളർച്ച ഒരുപരിധി വരെ ആശ്വാസം നൽകി. ഐടി സേവന കമ്പനികളെ സംബന്ധിച്ച് ലാഭത്തിലെ കുറവ് കുറഞ്ഞകാലത്തേക്ക് തലവേദനയാണ്. ആഗോള ക്ലയന്റുകൾ ചെലവ് ചുരുക്കുന്നതും, തൊഴിലാളികൾക്കുള്ള വേതനം വർധിക്കുന്നതും ഈ സമ്മർദ്ദം വർദ്ധിപ്പിക്കുന്നു.

ഇന്ത്യ എഐ മിഷൻ നേട്ടമാകുമോ?

ടെക് മഹീന്ദ്രയുടെ നീക്കം വെറുമൊരു പുതിയ പ്രോജക്റ്റ് മാത്രമല്ല.  ഒരു തന്ത്രപരമായ മാറ്റമാണ് . ജിപിടി-4, ജെമിനി, ക്ലോഡ് തുടങ്ങിയ വൻകിട കമ്പനികൾ പോലെ, 1 ട്രില്യൺ പാരാമീറ്ററുകളുള്ള വലിയ  എൽഎൽഎം  നിർമ്മിക്കുക എന്നത് ഇന്ത്യയുടെ എഐ മുന്നേറ്റത്തിലും നിർണായകമാണ്. ഫ്രാക്റ്റൽ അനലിറ്റിക്‌സ്, ഭാരത് ജെൻ (ഐ.ഐ.ടി. ബോംബെ കൺസോർഷ്യം) തുടങ്ങിയ സ്ഥാപനങ്ങളുമായി ചേർന്നാണ് ടെക് മഹീന്ദ്ര പദ്ധതിയുമായി മുന്നോട്ട് പോകുന്നത്.

നിർണ്ണായക പദ്ധതി

വിദേശ എഐ ഇൻഫ്രാസ്ട്രക്ചറിലുള്ള ആശ്രിതത്വം കുറയ്ക്കാൻ ഇത് ഇന്ത്യയെ സഹായിക്കും. പ്രാദേശിക ഭാഷകളെയും, ഇന്ത്യൻ സാംസ്കാരിക പശ്ചാത്തലങ്ങളെയും മനസ്സിലാക്കുന്ന ബഹുഭാഷാ  സംവിധാനം, സന്ദർഭോചിതമായുള്ള എഐയുടെ സഹായം ലഭിക്കാൻ സഹായകരമാകും. എഐ അടിസ്ഥാനമാക്കിയുള്ള ക്ലൗഡ് സേവനങ്ങൾ, ലൈസൻസിംഗ് തുടങ്ങിയ ഉയർന്ന ലാഭമുള്ള പുതിയ ബിസിനസ് ലൈനുകളിലേക്കും ടെക് മഹീന്ദ്രക്ക് പ്രവേശനം ലഭിക്കും. പുതിയ വരുമാന സ്രോതസ്സുകൾ തുറന്നു കിട്ടും. എഐയിലെ സർക്കാരിൻ്റെ ലക്ഷ്യങ്ങൾക്ക് പിന്തുണ നൽകുന്ന പദ്ധതി  സാങ്കേതിക രം​ഗത്തെ സുപ്രധാന നാഴികക്കല്ലാണെന്ന് കമ്പനിയുടെ ചീഫ് എക്സിക്യൂട്ടീവ് ഓഫീസർ മോഹിത് ജോഷി പറയുന്നു.

നിക്ഷേപകർ എന്ത് സമീപനം സ്വീകരിക്കണം?

ഹ്രസ്വകാലത്തേക്ക് നിക്ഷേപം നടത്താൻ ആ​ഗ്രഹിക്കുന്നവർക്ക് 0–6 മാസ കാലയളവിൽ ഹോൾഡ് ചെയ്യാം. (ദുർബലമായ വരുമാനം, യുഎസ് നയങ്ങളിലെ അനിശ്ചിതത്വം എന്നിവ ഓഹരിയുടെ മുന്നേറ്റം തടസ്സപ്പെടുത്താം.)

ദീർഘകാലത്തേക്ക് (12–36 മാസം വരെ) നിക്ഷേപം നടത്താൻ ആ​ഗ്രഹിക്കുന്നവ‍ർക്ക് കറക്ഷൻ വരുമ്പോൾ വാങ്ങാം. (സർക്കാരിൻ്റെ പിന്തുണയോടെയുള്ള എഐ പദ്ധതി ഭാവി വളർച്ചയ്ക്ക് ശക്തമായ അടിത്തറ നൽകും.)

വർഷങ്ങൾക്ക് മുമ്പ് ടി.സി.എസ്., ഇൻഫോസിസ് എന്നീ കമ്പനികൾ ഇന്ത്യയുടെ ഐ.ടി. വിപ്ലവത്തിന് നേതൃത്വം നൽകിയതുപോലെ, ടെക് മഹീന്ദ്ര ഇന്ത്യയുടെ എഐ വിപ്ലവത്തിന് നേതൃത്വം നൽകാനുള്ള സാധ്യതയുണ്ട്. വിജയകരമായി ഈ എഎൽഎം പ്രോജക്റ്റ് പൂർത്തിയാക്കിയാൽ, കമ്പനി ഒരു സാധാരണ ഐടി. സേവന ദാതാവ് എന്നതി നിന്ന് മാറി എഐ രം​ഗത്തെ നിർണായക റോളിലേക്കെത്തും.ദീർഘകാല വളർച്ചയ്ക്കായി എഐ ഇൻഫ്രാസ്ട്രക്ചർ മേഖല നിരീക്ഷിക്കുന്നവർ ടെക് മഹീന്ദ്ര ശ്രദ്ധിക്കാതിരിക്കരുത്..